BJP/MNF hnâwl turin mipui an ngen

MPCC & ZPM Publicity Committee chuan nimin khan Aizawl Press Club-ah thuthar thehdarhtute an kâwm a; BJP sor­kar chu India ram pum bakah, Mizoram tan bik pawh harsatna siamtu an nih avangin, an sorkar tawh loh a ngai tih an tarlang a, BJP leh an thawhpui MNF leh party dangte chu hnâwl turin mipui an sáwm.

MPCC & ZPM Publicity Committee chairman Lallianchhunga chuan, India ram siamṭha turin Central-ah BJP an sorkar tawh loh a ngai tih sawiin, "MNF leh BJP hi NEDA leh NDA hmanga an inzawm tlat avang leh, central lama BJP a sorkar theihna atan an puih miau avangin MNF hi BJP notê dik tak an ni a, BJP kan hnâwl dawn chuan MNF kan hnawl a ngai a ni," a ti a; MPCC leh ZPM thlawp mipui candidate Lalnghinglova Hmar leh Lalbuanga Sailo-te vote turin Mizoram mipui a ngen.

Lallianchhunga chuan, kum 2014-ah MNF thurualpui BJP/NDA-in sorkar laipuia thuneihna an chan hnu, kum 2015-ah eirawngbawlna gas-ah kalphung tihdanglam a ni a, mipui an buai phah hle tih a sawi a, "Direct benefit transfer for LPG (DBTL) a hmang a, mipuiin gas a man toa leiin, an bank account-ah subsidy pawisa lut turin a ruahman. Bank account-ah pawisa a lut ṭha leh si lo a, mipuiin harsatna naménlo kan tâwk ta a ni," a ti.

Prime minister Narendra Modi hruai BJP sorkarin November 8, 2016-ah Rs. 500 leh Rs. 1,000 note a tithi thut tih sawiin Lal­lianchhunga chuan, "India rama dan loa sum léngvâk, black money leh pawisa lem tam lutuk tihtawpna tura ruahman niin sawi mah se, black money leh pawisa lem a tâwp phah lo a, mipuiah harsatna naménlo a thlen zawk a ni," a ti a; pawisa tihthih vangin mipui an buai nasa a, mi 100 chuangin an thih phah niin a sawi.

NDA sorkar hnuaiah SBI bank account-ah awmna hmun azirin Rs. 1,000 - 3,000 a awm ngei ngei a ngai tawh tih sawiin, minimum balance nei lote chu pawisa chawitir an nih avangin mi retheite tan phurrit a nih thu a sawi a, "He kalphung thar hi hman a nih aṭanga thla riat chhungin account-a pawisa awm tlem vanga hremna pawisa chawitir tlingkhawm chu cheng vbc. 1,771 a tling hman. Mipui harsatna hi sorkarin a hlâwkpui hle a ni," a ti.

Lallianchhunga chuan, tribal-te pawh zuah loa Tax Deduction at Source (TDS) lâk tumtu chu BJP sorkar a nih thu te, central-a BJP/NDA sorkar hnuah India ram hmun hrang hrangah bâwng talh khap a ni a, kum 2014-2017 chhungin bawng humhalh vang­in mi 28 an thih phah thu te, PM Narendra Modi-a'n inthlan dawnah India ṭhalaite tan kum tin hna nuai 2,000 siam thar a tiam laiin, BJP sorkar term kal mek chu kum 45 chhunga India rama unemployment problem san lai ber a nih thute a sawi bawk.