Rualbanlote chanvo zirho

Zoram Entu Pawl (ZEP) chuan nimin khan ZEP Conference Hall-ah pianphunga rualbanlote danin chanvo leh hamṭhatna a pekte chungchagn zirhona an buatsaih a, MJA president Zonunsanga Khiangte khuallian a ni.

Zonunsanga Khiangte chuan, ZEP-in rualbanlote tana hma a lak tawh leh lâk mekte chu ropui a tih thu sawiin, ram leh hnam changkang zelah, tun hmaa rualbanlote chhaih nawmnah ang chi chu a reh tial tiala a hriat thu a sawi.

MJA President chuan, Commissioner for Persons with Disability (PwD) aṭanga a hriat danin, sorkar department 44 aṭanga report an dawn tawhah PwD mi 59 chu sorkar hna nghet pek an ni tawh tih a sawi rualin, "Hetiang a nih rual hian PwD-te tana sorkar hmalakna chu a la duhkhawpawm lo deuhin a lang, hei aia tam theih dan sorkar­in ngaihtuah se a duhawm hle a ni," a ti.

ZEP director S Lawrence Kennedy-a'n PwD-te hamṭhatna chungchang zirhona buatsaih chhan a sawi a; resource person Lalfamkimi, advocate-in Rights of Persons with Disabilities Act 2016 chungchang a sawifiah. Lalfamkimi chuan, "An tih theih ang ang ti tura hna pek hi danin a phût a; thawh chhuah nei loa an awm ringawt loh a, an theih ang an tih ve danin a ngai pawimawh a, an chanvo a ni," tiin a sawi.