BJP leh MNF boruak a chhe lo - JV Hluna

BJP, Mizoram Pradesh president Prof. JV Hluna chuan nimin khan Serchhipa Jemela Hotel-ah thuthar thehdarhtute a kâwm a; BJP leh MNF inkar boruak a chhe lo tih sawiin, Aizawl West-I Assembly bye-election-ah pawh BJP-in candidate hran siam loin MNF candidate an pui dawn tih a sawi.

Press mite zawhna chhangin Prof. JV Hluna chuan, Mizo mipuiin BJP an thinhrik avangin BJP chu MNF-in an chhiatpui an hlau a, chuvang chuan an thawhpui duh lo niin a sawi a; chutih rual­in, BJP leh MNF inkar boruak a chhe lo a, Aizawl West-I bye-election-ah pawh BJP-in candidate hran siam loin MNF candidate an puih dawn thu a sawi a ni.

BJP-in Lok Sabha inthlan turah candidate atan Chakma an neih chhan zawhna chhangin JV Hluna chuan, a tirah chuan Mizo ngei candidate atan rawtna an thehlut tih a sawi a; mahse, BJP candidate chu Mizo pawh ni se, Mizo mipuiah vote a hmuh ṭhat loh an ring tho a, hnam tênau zawk aṭanga candidate siam chu hnam tênau ho vote hûi theih hotu lian zawkte'n an beisei avangin Chakma an dah ta niin a sawi.

Prof. JV Hluna chuan, an MP Candidate Nirupam Chakma leh a pa Snebu Kumar Chakma te chu Mizo zingah an mikhual lo tih sawiin, Nirupam Chakma chu Hindi leh English nâl taka a thiam avangin Lok Sabha-a debate-ah pawh mikhual lo tura a ngaih thu a sawi a; "Lok Sabha hi Pathian thu sawina tur a ni lo a, sakhaw thu sawina hmun a nih dawn loh avangin, Parliament-a rawngbawlna zau zawk neih tumte tan Mizoram tan thil ṭha puak chhuah a har dawn a ni," a ti.

BJP hruaitu Ram Yadav, Union minister of state ni bawkin Nirupam Chakma chu MP atana thlan tlin a nih chuan a kuta dah tura a sawi avangin, Central minister a nih ngei an rin thu JV Hluna chuana sawi a; Citizenship Amendment Bill chung­changah, BJP president Amit Shah-a'n CAB pass ngei a tiam rualin, CAB tharah chuan hmarchhak state-te him ngeina tur dah a nih tur thu a sawi tel niin a sawi bawk.