Theitawp chhuahin CAB kan do - Zoramthanga

MNF president Zoramthanga chuan Lok Sabha inthlanpui neih turah nimin khan campaign-in Kawnpui, Kolasib, Bilkhawthlir leh Vairengte a tlawh a; theih­tawp chhuahin The Citizenship Amendment Bill (CAB) an do niin a sawi.

Zoramthanga chuan, inthlan lo awm tura MNF-in beih an tawhna ber chu CAB a nih thu sawiin, "He Bill do hian min beitute hian kan beih zat an bei lo. Kan theih tâwk kan chhuah a, CM ka nih phata ka beih hmasak a ni. Prime Minister pawh opposition nia CM lo ni-ho ṭhin kan ni a, ka nêl sa a ni a, CAB kan duh loh thu na takin ka thlen. Home Minister pawh ṭum hnih ka hmu hial a ni," a ti.

A kaihhruai sorkarin CAB duh loh thu Cabinet meeting-ah an pass tih sawiin Zorama chuan, "Assembly House-ah meuh kan pass a, theih­tawp kan chhuah a ni," a ti a; hma la ṭha lo tia puhtute chu sawisel tur zawng hrim hrim an nih thu a sawi.

MNF President chuan, an khing­pui an hu­phurhawm lo nia sawiin, "Pu Duhoma leh Pu Sapdanga pawl ZPM chu Congress nen an ṭangho a, ZPM chu an vànglai a liam dêr tawh tih kan hre awm e. 'MNF an ṭha lo, Congress an ṭha lo' tiin an au a, heti hian an thawkho leh mai. Congress pawh thawhpui duh ta chu kah chhuah tak tak tlak an ni lo. Tu chiah nge an nih kan hre chho mek a ni," a ti.

Congress chu zu an zawrh vang­a ṭhalai tam tak thihna thlentu, hmeithai leh fahrah tam tak siamtu an nia sawiin Zoramthanga chuan, "Hman ni maiah mipuiin kan ning a, kan paihthla a, development engkim tichâwltute an ni," a ti a; zu zuar tura fuih pawrhtu ZPM hotute leh zu zuar Congress an thawkho niin a sawi.

Serlui bialtu MLA Lalrinsanga Ralte pawhin thu sawiin, "Kum 10 Congress sorkar khan Zoram hmun dang ang bawkin Serlui bial hi a ngaihthah hle. Tunah erawh chuan káwl a eng ṭan mek a, thla thum chhunga MNF hnathawh hi kum 10 Congress sorkar hnathawh ai khan a tam chu kan ti lo, MNF hnathawh hi a lang hle a ni," a ti.