Border trade ka ngai pawimawh dawn - Lalnghinglova Hmar

ZPM leh Congress party-in an thlâwp mipui candidate Lalnghing­lova Hmar chuan, Lok Sabha MP atan thlan tlin a nih chuan ramria insumdawn tawnna (border trade) chu a ngaih pawimawh turte zinga mi a nih thu a sawi. Lalnghinglova Hmar hian nimin khan khawchhak tlangdunga khaw hrang hrang a tlawh a, Champhaiah thuthar theh­darhtute a kâwm.

Lalnghinglova Hmar chuan, Mizoram hmasawnna atan border trade a pawimawh hle tih sawiin, "Thlan tlin ka nih chuan border trade ṭha taka kalpui a nih theihna atan theihtawp chhuah ka tum. Mizoram, a bik takin khaw chhak tlangdung tana pawimawh em em Indo-Myanmar Border Trade hi a nihna anga a kal loh chhan ka ngaihven ang a, a nihna anga a kal theihna atan theihtawp ka chhuah dawn a ni," a ti.

Champhaia thuthar tharthehdarhtute a kawmnaah Lalnghinglova chuan, journalist welfare a ngaih pawimawh thu sawiin, "MP ka nih chuan journalist-te tan sum leh pai lam emaw, a service ang zawng pawhin pawh luh tur tam tak a awm ka ring. Press tour-te pawh MP kaltlanga buatsaih dan kan zawng dawn a ni," a ti a; journalist-te tan training ṭha zawk buatsaih dan a zawn tur thu a sawi.

Lalnghinglova Hmar chuan, ṭhalai a nih ang­in ṭhalaite hmasawn zelna chu a thil ngaih pawimawh tak a nih thu sawiin, "Sorkar hna ringawt ni lo, ṭhalaite eizawnna tur kawng hi MP ka nih chuan ka hai chhuak thei ngeiin ka ring. Entrepreneurship, skill training, sport, music, tourism leh thil dang hmangin ṭhalaite tan eizawnna buatsaihsak tur­in theihtawp ka chhuah ang," a ti.

MP inthlan turah ruling leh ruling lo an la awm lo tih sawiin Tetea Hmar chuan, "State-ah chuan MNF an sorkar tawh a, tluang takin sorkar se ka duhsak. MP-ah chuan ruling tur kan thlang dawn chauh. Kan vote thlak tur hi a pawimawh a, a tawp­a Prime Minister siam theitu a ni," a ti a; BJP leh kaihhruai NDA an sorkar tawh lohna atana vote thlak turin mipuite a sáwm a ni.