KHAWTHLIR
Ambulance hlân
Lawngtlai Area TKP Coordination Committee chuan March 26, Thawhlehni khan Christian Hospital, Lawngtlaia ambulance hman tur Eeco van an hlan. Lawngtlai area ṬKP hian MTKP Inkhawmpui 2016 an thlennaa sum hman bâng aṭangin Eeco van hi an lei a, Lawngtlai Area ṬKP chairman Lalhriatpuia'n BCM general secretary Rev. F Ramdinmawia hnenah a hlan a ni.
Tlan phal lo
Traffic SP Rodingliana Chawngthu chuan thupek chhuahin, Venghlui, Pi Pangi Pêng bulah culvert siamṭhat hna thawh a nih dawn avangin, Treasury Square to Pi Pangi Pêng, Venghlui/Upper Repub-lic inkar kawngah March 28-30 inkarah 407 truck aia lian lirthei tlan a khap. Thupek hian bus a huam lo.
Handloom Expo
MAHCO chuan nimin khan Kolasib-a Brig. C.Vankunga Shopping Centre-ah ni thum awh tur Kolasib Special Handloom Expo an buatsaih a, Kolasib district bawrhsap Zoengsanga'n a hawng. MAHCO hian Special Handloom Expo hi Mamit, Lunglei leh Lawngtlai ah huaihawt tawh a; Kolasib-a Expo an buatsaih lehah hian society hrang hranga inziak lut Aizawl leh Thenzawl aṭangin stall 13 hawn a ni.
Lungin dêng hlum
Nimin chhun dar 12:45 vel khan Lalngaihzuala s/o Lalchhandama, Lungpho chu ram kâng an ṭhelhna lamah lungin a dêng a, ká chhawn lohin a thi. Thu dawn danin, Lalngaihzuala hian a nupui leh an fate pahnih a kalsan a ni.
Book of the Year
Mizo Academy of Letters (MAL) chuan kum 2018 chhunga Mizo iráwm chhuak lehkhabu tihchhuah zinga ṭha ber, Book of the Year thlanna kal mekah, a ṭha zual pathum an thlang chhuak. Top-3 te chu - Zoremi Hmar Zote ziah 'Chumchi leng' tih te, Mafaa hauhnar ziah 'Hringnun hrualhrui' tih leh, Lalṭhuamliana ziah 'Vantlang vanram' tihte a ni. Top-3 aṭangin Book of the Year thlan chhuah a ni ang.