MZP hruaitute leh CADC hotute inkâwm

MZP General Headquarters hruaitute leh Chakma Autonomous Council (CADC) thuneitute chu nimin khan CADC Chief Executive Member (CEM) office, Chawngte-C ah an inkâwm. MZP hruaitute chuan CADC chhunga Zo hnah­thlak khaw hrang hrangte fangin, an dinhmun an zir chiang nghal bawk.

Inkhawmnaah hian MZP hruai­tute chu president L Ramdinliana Renthlei-in a ho a, CADC thuneitute chu CEM Rosik Mohan Chakma-a'n a ho thung. MZP hruaitute chuan, CADC area-a Mizo khuate chu CADC aṭangin ngaihsaka ṭanpuina awm theite pek ve chungchang te, Chakma khua dan loa dinte ṭhiah dan tur te, Bangladesh aṭanga dan loa foreigner lut tam lutuk chungchangte an sawi lang.

CADC area-a Mizo missionary-te'n harsatna leh enhran an tawh chungchang te, CADC-a thawk tur laknaah Zo hnahthlakte lak ve an nih theih dan tur te, CADC-a Chakma inhung bikna dan chung­changte an sawi chhuak bawk.

CADC CEM Rosik Mohan Chakma chuan, CADC area-ah Chakma-te tana inhungbikna dan, Chakma ni lote'n in leh lo leh ram an neih theih lohna dan siam a awm loh thu sawiin, "Chakma ni lo pawhin an duh a, pawisa an neih chuan in leh lo, ram an lei vek thei a, Chakma inhung bikna dan kan nei lo," a ti a; CADC area-a Mizo khuate duhsak loh bikna a awm lo a, Chakma khuate nen angkhat veka an en thu te, dan loa khaw din tlemtê awm chu ṭhiah dan tur MZP-te nen ngaituahho a duh thu a sawi.

CADC CEM chuan, CADC sorkara hna lakah a theihna chinah Zo hnahthlakte an lo duhsak tur thu a sawi a; Bangladesh aṭangin dan loa foreigner lut an awm tih an hriat thu sawiin, "An tam leh tam loh kan chiang bik lo a, keini CADC thuneitute pawh hian foreigner hi lo lut lo se kan duh hle. Mizoram sorkar nen ṭangkawpin foreigner dap chhuah kawngah hma kan laho zel dawn a ni," a ti.