Biate tui lâkna enchhin

PHE department-a Serchhip WATSAN Division hotute chuan nimin khan Biate Water Supply Scheme (WSS) a hmunah an endik a, hlawhtling takin enchhina (trial run) an nei nghal. He scheme siamna atan hian NERDP aṭangin cheng nuai 1364 hmuh a ni.

Biate WSS (Pumping)- ah hian Tuipui lui aṭangin Biate khaw hnuai Sesik pêng kâwnah tui pump chhoh a ni a, chuta ṭangin Biate khaw chung­a Chawngdawla Sikul hmuna main reservoir-ah tui pump chhuah a ni. Pump set pakhatin darkar khatah tui litre 20,000 an pump chhuak thei dawn. Tun dinhmun­ah hna pumpui aṭanga 70% zawh a ni tawh a; a pumpuia zawh a nih hunah chuan Biate khuaa chhungkaw tinin tui connection neiin, ni tin mi pakhat tan tui litre 135 zel pek theih tura ruahman a ni.