Disrtrict tihpuitlin nan vbc. tam tak Kan dah belh zel dawn - R Lalthangliana

MNF vice president Dr R Lalthangliana chuan nimin khan Hnahthial Bazar kâwna vantlang inkhawmah thu sawiin, district headquarters thar pathum tihpuitlin nan cheng vaibelchhe tam tak an dah belh zel dawn tih a sawi.

Dr R Lalthangliana hi a bial chhunga khaw lian ber Hnahthialah an lo chawi­mawi a; thu sawiin, budget bu chu a taka Hnahthial, Sai­tual leh Khawzawl district tihpuitlin tur tih­nghehna a nih thu a sawi a, "A bua mi lo pawh district hian ken tam tak a nei. De­partment hrang hrangah bul ṭan tur kan ngah. Tuna district function nana kan pawisa dah kha chu thla li chhung atan chauh a ni a, cheng vbc. tam tak kan dah belh zel dawn a ni," a ti.

R Lalthangliana chuan, "Keini chuan kan sawi lâwk angin budget session hmasa berah district tihpuitlinna kan pass mai a, kan tih loh tur kan sawi ve lo," a ti a; SEDP bikah budget-a lang lo tam tak hmuh tur a awm dawn thu leh, SEDP chu a dawngtute hlawhtlinpui ngeina turin an kalpui dawn a, kohhran thawhlawm thlengin a pung dawn niin a sawi.

MNF Vice President chuan, Health Care Scheme-ah cheng vbc. 50 aia tlem lo, kal dan mumal zawkin an dah dawn tih sawiin, "Cabinet meeting hmasa berah zu zawrh tihtawpna kan pass a, blood processing fee kan titawp a, motor chhiah pawh mipui duh dana kalpui turin thu kan titlu a ni," a ti a; MP inthlan turah MNF candidate C Lalrosanga vote turin mipui a sáwm a ni.