Tun hi Lok Sabha inthlan a ni - Duhoma

ZPM leader Lalduhoma chuan, April 11, 2019-a Mizoram puma inthlanna awm tur chu eng inthlanna nge a nih hriat chian a ngai tih sawiin, "India ram roreltu tur MP thlanna tur a ni a, kan thu khel pawh MLA inthlanna nen a inang lo," a ti.

Nimina Champhai Vengthlanga van­tlang inkhawmah thu sawiin Lalduhoma chuan, "Mizoramah hian inthlanna hrang hrangah party thawkho an awm ṭhin a, a hun laia issue mil zela thawkho an ni. MNF leh MPC-te hi party-ah chuan inhal ber tur anga ngaih ni mah se, an lo thawkho fo tawh. A hun laia boruakin a hril chuan ram ṭhatna turin thawhpui kan nei tawh ṭheuh a ni, " a ti a; MP leh MLA inthlana Mizorama party hrang hrang thawhho tawh dan a sawi.

Lalduhoma chuan, inthlan awm tur chu MLA inthlan ang a nih tawh loh thu te, thu inchuh a danglam tawh thu te, Central sorkar lama hnathawh dan ngaihtuah a nih tawh thu te, BJP lamṭang leh BJP lo lamṭang inbeihna a nih thute sawiin, "Zu zawrh, sawhthing leh district lam sawi chi a ni tawh lo. MP-ah hian tu pawh tling se, zu zawrh leh zawrh loin nghawng a nei tawh lo. He inthlana kan thil inchuh hi chu a dang daih a ni," a ti.

Serchhip Bialtu MLA chuan, "Tun ṭuma Congress leh ZPM-in independent candidate thlâwp tura kan thawho chhan chu, India rama BJP sorkarna tihtàwp kan tum vang te, Citizenship Amendment Bill put luh luih tumtute dodal turte leh, kan ram leh hnam bakah, kan sakhaw humhimna turin a ni," a ti a; MNF chu NDA-a tel an nih avang­in BJP nen thawk dun an nih thu a sawi.

Lalduhoma chuan, MNF chu an din chhan theihnghilhin BJP puihna sum an duh avanga NDA thláwpah a puh a; MNF dintu Laldenga la dam se chuan NDA hnuaia BJP thawhpui chu a duh a rin loh thu a sawi bawk.