ECI leh Mizoram Election dinhmun Hriatthiampui turin Joint NGO ngen

Chief electoral officer (CEO) Ashish Kundra chuan, Tripura relief camp-a awm mek Mizoram Bru-te Kanhmuna vote thlaktír tum a nih chungchangah, Mizorama Election official-te leh Election Commission of India (ECI) dinhmun chu NGO Coordination Committee-te'n hriatthiampui se a duh thu a sawi.

CEO Ashish Kundra hian nimin khan chanchinbumi ṭhenkhatte léngah sáwmin, India ram puma inthlanpui neih tur leh Mizoram bik dinhmunte NIC Media Centre-ah a sawipui a; an hmalakna hrang hrangte a sawi rualin, chanchinbumite pawhin an ngaihdante an sawi a ni.

Ashish Kundra chuan, November 28, 2018-a Mizoram Assembly inthlanpuiah Tripura-a Mizoram Bru-te tan Kanhmunah special polling station siam a ni tih sawiin, "Hlawhtling takin vote an thlak a, Bru mi 6,000 chuangin vote an thlak a ni," a ti a; April 11, 2019-a Lok Sabha inthlanpui awm turah pawh Bru-te chu Kanhmunah vote thlaktir leh tum a ni a, mahse, Joint NGO lamin an duh loh thu an dawng tih a sawi.

Mizoram Election department hotute chuan, Tripura relief camp-a awm Mizoram Bru-te chu vote an neihna polling station-ah ṭheuh vote thlaktir tur leh, Kanhmunah special pooling station siamsak tawh loh an duh thu leh, Kanhmuna special polling station siamsak a nih chuan hma an lak tur thu ziakin an dawng a ni. Joint NGO duh dan chu ECI-ah an thlen nghal a; mahse, ECI chuan Bru-te chu Kanhmunah vote thlaktir turin ruahmanna a siam a ni.

Ahish Kundra chuan, Joint NGO-te chu an dinhmun hriatthiampui turin a ngen a, "Democracy-ah chuan viter tinin vote thlak turin zalenna chanvo kan nei a... Bru-te hi Kanhmunah thlamuang takin vote an thlak thei a, vote i thlaktir ang u," a ti.

Mizoram CEO chuan, Joint NGO-te'n Kanhmunah Bru-te tan special polling station siam pawh an duh tawh loh laiin, Bru-te chuan an awmna camp-ah ngei vote thlaktir turin ECI-ah ngenna an thlen ve reng tih a sawi a; chuvang chuan, Joint NGO leh Bru-te duh dan ngaihtuah ve vein ECI thlirna aṭang chuan Kanhmuna vote thlaktir chu a lái hlea ngaih a nih thu a sawi bawk.

CEO sawi danin, tun hnaia electoral roll ennawnnaah NGO-te'n Bru voter 8,000 - 9,000 vel paih dilna an thehlut a, mahse, pawm theih a ni lo. ECI-in a pawm theih loh chhan chu - inthlan kumah a hlawma voter paih (mass deletion) a theih loh a, vawi khatah application 10 aia tam a pawm theih loh bawk a ni. Hemi chungchangah hian CEO chuan, Bru-te electoral roll aṭanga paih tura hmalakna chu inthlan dáwn hnaiah ni lo, inthlan boruak awm loh laiin tih ni se a ṭhaa a rin thu a sawi.

Kum 2018-a Assembly inthlanpui neih hmaa Chief Election Commissioner Mizorama lo zin hnenah, Mizorama let duh lo Bru-te Mizoram electoral roll aṭanga paih a, Tripura electoral roll-a thun chungchanga press mite zawhna leh CEC-in hmalak theih a nih a sawi chungchang sawi chhuah a ni. Hemi chungchangah hian Election official-te chuan, inthlan boruakin Mizoram a la chiah chhunzawm zel avangin hmalak theih a nih rih loh thu leh, hmalak a nih dawn pawhin, NGO mai ni lo, state sorkar bawhzui tur nia an ngaih thu an tarlang.