Aizawlah Jessami Day hman a ni

Indopui Pahnihna laia 1st. Assam Rifles sipaitel'n Nagaland-a Kohima dái, Jessami-a Japan rál an lo danchah hriat rengna hun, Jessami Day chu nimin khan Aizawlah hman a ni a; sorkar hotute leh sipai bángte'n Mizoram Ex-Service League (MESL) bultumin nimin zing khan Treasury Square-a War Memorial-ah ram tana nun hlantu sipaite hriatrengna pangpar an dah.

Nimin zing kara War Memorial-a Jessami Day hmannaah hian ram tana nunna hlantute zahna leh hriatrengna pangpar dah a ni a; Home minister Lalchamliana'n pangpar a dah hmasa ber a, a hnu­ah chief secretary Lalnun­mawia Chuaungo, Assam Rifles 23 Sector DIG Brig. Vinod S leh Assam Regiment Centre, Shillong-a hotu Col. Arindam Majumdar te, Sainik Welfare & Re­settlement director Surg.Lt. Cdr. Lalnuntluanga bakah, MESL president Col. John Zama leh sipai báng dangte'n an dah a ni.

Nimin chawhnu lam khan sipai bángte chuan Jessami Day pualin 46 Assam Rifles hmuna Loch Hall-ah inkawm khawmna hun an hmang a, zanriah an kîlho nghal.

Indopui Pahnihnaa Jessami-a Japan sipaite India rama lut tur dangtu 1st. Assam Regiment sipai zingah hian Mizo 200 vel an tel ve a; mi eng emaw zat an thi a ni.