Anganwadi worker-te'n inkhawmpui hmang

All Mizoram Angan­wadi Workers (AMAW) chuan nimin khan a ṭum khatna atan Vanapa Hall-ah inkhawmpui an hmang a, an lawmman tihsan an duh.

Inkhawmpui hi AMAW president Lal­ram­buatsaihi'n a kaihruai a; Social Welfare depart­ment (SWD) director Lal­dik­kimi chuan, naupangte chu nakina ram hruaitu la ni tur an nih thu sawiin, "Anmahni enkawltu anganwadi worker-te hian mawhphurhna lian tak in nei. Naupangte hian an zirtirtute nungchang an entawn ber a ni ṭhin a, chuvang chuan in­cheina, nunphung leh ṭawngkamte uluk tak hman tur a ni," a ti.

Inkhawmah hian AMAW secretary Mal­sawm­kimi'n an pawl dintirh aṭanga an hmalakna hrang hrangte leh an hmachhawpte a sawi a; treasurer Vanzamliani'n sum dinhmunte a tarlang.

Chawhnu lamah ro an rel a; anganwadi worker-te'n an lawmman lak mek Rs. 4,950 chu Rs. 10,000-ah tihpun helper-te'n lawmman an lak mek Rs. 2,750 chu Rs. 5,000-ah tipun a nih theih nan sorkar ngen an rêl.

AMAW hi November 16, 2016-ah Chanmari YMA Hall-ah ICDS hnuaia project 27 kal­khawmte'n an din a ni a; ICDS hi Mizoramah kum 1978-ah kalpui ṭan niin, kum 1979-ah East Lungdarah kalpui ṭan a ni.