Thla thum chhungin hna tam tak Kan thawk hman - R Lalthangliana
MNF vice president Dr R Lalthangliana chuan, MNF sorkar thla thum chauha upain hna tam tak an thawh hman avangin an khingpuite'n beihna vak an hre lo niin a sawi.
Lok Sabha inthlan atana a bial chhunga khaw hrang hranga nimina a campaign-naah Dr R Lalthangliana chuan, "Thla thum chauh sorkarah hian hna tam tak kan thawk hman a, chuvangin, kan khingpuite hian beihna dang min hre lo. Citizenship Amendment Bill (CAB) leh NEDA/NDA tih vel bak beihna dang min hre lo" a ti.
MNF Vice President chuan, an party tluka CAB do leh bei nasa Mizorama political party dang zingah an awm lo nia sawiin, "Kan Chief Minister pawhin Mizoramin CAB kan duh loh thu Prime Minister leh Home Minister pawh hmuin a sawipui tawh," a ti a; CM hian PM leh HM hnenah CAB an titlanglui a nih chuan NEDA/NDA aṭanga an inhnuhdawh tur thu a hrilh niin a sawi.
BJP thawhpuitu dik tak chu ZNP leh Congress-te an nia sawiin, "CADC inthlanah Congress-in BJP thawhpuiin sorkarna an siam a, Aizawl North-III MLA bye-election leh AMC-ah khan Pu Duhoma hian BJP a thawhpui a ni. Eng inthlanah mah MNF hian BJP a la thawpui lo tih hre chiangtu chu Mizo mipui kan ni. MNF hi BJP ta em em bik anga min puhna hi thudik lo a ni," a ti.