MP taima leh viak ṭha nih ka tum - Lalnghinglova Hmar

Lok Sabha inthlan tura mipui candidate Lalnghinglova Hmar chuan, MP taima leh viak ṭha tak nih a tum thu a sawi a, "Ṭhalai ka la ni a, ka chak vanglai tak a nih avangin hlâwk taka hna ka thawh theih ka beisei," a ti.

Congress leh ZPM-in an thlâwp MP candidfate Tetea Hmar hian nimin khan Biate, Mual­chéng, Bâwktláng, Chekâwn, Khaw­lailung, Keiṭum leh Thing­sulthliahahte thu a sawi a; "MP hna pawimawh dan hi ka chhiar belh zel a, hnathawh theih a nei sang hle. Heng hnate thawk tur hian Mizoram aiawh MP taima, viak ṭha tak leh inpe zo nih ka tum a ni," tiin, mipuite chu ram leh hnam tana hna a thawh theih nan MP atan thlang turin a sáwm.

Lalnghinglova Hmar chuan, Mizoram ṭhenawm state-te chuan MP ṭhalai leh viak ṭha tak tak neiin, an state tan an ṭangkai tak zet tih a sawi a, "Mizo ṭhalaite pawhin chu chu kan thawk ve thei ngei ang. Mizo mipuite Mizo ṭhalaite theihna ring ngam turin ka sawm che u a ni," a ti.

Citizenship Ammendment Bill chungchang sawiin Tetea Hmar chuan, "CAB kan do a, a pass luih tumtu NDA pawh kan dem. CAB duh lo tak tak chuan a pass luih tumtu NDA hi kan thawhpui thiang lo," a ti a; BJP leh NDA hotupa Amit Shah-a'n CAB kaltlangpui an tum thu Assam-a a sawi chhuak chu India hmarchhak mipui zahlohna lian tak a nih thu a sawi.

Lalnghinglova chuan, thlan tlin a nih chuan ṭhalaite eizawnna a dah pawimawh tur thu sawiin, "A bikin ṭhalai lehkha zir lama chak lo zawkte tana eizawnna dappui ka tum. Mizoramah kum lama upa tawh enkawl ngai, enkawltu nei mumal lo an pung zel hi ka ngaimawh a, puih ka duh a ni. Hei bakah hian, loneitute tana training awmze nei zawk leh mithiamte chah luta inzirna buatsaih ka tum," a ti.

Lalnghinglova Hmar chuan, politics a nih tâk avanga dâwt ngial­ngana beihna nasa tak a dawnte chu chhàn ṭul a tih loh thu a sawi a; amah duhsaktute pawh thu dik hrûlah dâwt hmanga mi dang bei ve lo turin a ngen a ni.