KHAWTHLIR

Society nihna tihtawp rêl
NLUP General Body chu nimin khan Secretariat conference hall-ah an ṭhukhawm a, Society Memorandum of Association hnuaia article 26-in a sawi angin, NLUP Implementing Board (NIB) chu society a nihna ṭhiah (dissolve) turin thutlukna an siam. NLUP Implementign Board hi Mizoram Societies Registration Act, 2005 hnuaia ziah luh (registration No.263 of 23.06.2009) a ni a; March 2019 tawpah tihtawp ve nghal tura tih a ni.

ANC endik
Aizawl North College chu March 26-27, 2019 chhung khan National Accessment & Accreditation Council (NAAC) accreditation second cycle atan NAAC Peer Team-in an endik. NAAC Peer Team hi chairperson Prof. Bishnu Charan Barik-in a ho a, member dangte chu Prof. Niranjan Roy leh Dr Pandurang Bhabad te an a ni. Aizawl North College-ah hian B.A zirlai 1,243 an awm mek.

FSL tan sum pe
Ministry of Home Affairs-a Women Safety Division chuan Mizoram Forensic Science Laboratory (FSL)-a DNA analysis tihchangtlunna leh cyber forensic dinna atan tun hnai khan cheng nuai 419 a pe chhuak. He thil atana sum ruahmante chu MHA-in a tum vek tur a ni a, Mizoram sorkarin tum ve tur a nei lo.

Loan ngaidam
State Bank of India-a Regional Business Officer, Aizawl chuan thuchhuah siamin, Pulwama-a mi firfiakte'n CRPF sipai an thahte loan pûk ngaidam tura thuchhuah a awm angin, SBI-a loan la mi 21-te'n loan an la rulh zawh loh cheng nuai 98.33 chu ngaihdam an nih thu an tarlang. Loan ngaihdam zingah hian SBI, Mission Veng Branch-a loan la la rulh zawh loh cheng nuai 4.23 pawh a tel a ni.

Election training
Lok Sabha inthlanpui awm tura inbuatsaihna atana Lawngtlai district chhunga polling station 165-a presiding officer leh assistant presiding officer-te tan nimin khan Don Bosco School, Lawngtlaiah training buatsaih a ni. Training hmanpuitu district bawrhsap Shashanka Ala chuan, election official-te chu an mawhphurhna pawimawhzia hria a, an mawhphurhna hlen chhuah tum turin a chah.