ICFAI University-ah lungawi lohna an lantir

ICFAI University, Mizorama zirlaite leh zirtirtute chuan ICFAI University Students’ Action Committee (SAC) huaihawtin nimin khan an campus-ah lungawi lohna an lantir. Lungawi lohna an lantir chhan hi ICFAI Society, Hyderabad-in Mizoram sorkar hnena a intiam anga ICFAI University, Mizoram a kalpui loa an hriat vang a ni.

ICFAI University SAC chuan, ICFAI University, Mizoram chu kum 10 chuang ICFAI Society, Hyderabad enkawlna hnuaiah a kal tawh tih sawiin, harsatna tam tak an tâwk chho tih an tarlang a, "ICFAI University zirlaite'n an harsatnate an au chhuahpui loh chuan awp beh leh an phu tâwk enkawlna dawng lo a, ICFAI Society hian zirna hmasawnna aia sumdawn nan chauh a hman zel hlauhthawnna vangin kan au chhuahpui ta a ni," an ti.

Zirlaite'n hamṭhatna leh chanvo tur dik tak an hmuh theih nan, ICFAI University Mizoram Act leh Statute-in a phût angin, an harsatnate chu hriatpuia hma laksak turin Mizoram sorkar an ngen.

Lungawi lohna lantir a nih chung­changah hian Higher & Technical Education joint director Ramhmangaiha Ralte chu a hmunah nimin khan tirh a ni a; a kaihhruaiin chawhnu dar 1:30-ah ICFAI University hotute nen an sawiho. University Vice Chancellor, SAC hruaitute leh MZP leh MSU hruaitute pawh an tel.

ICFAI University Mizoram SAC hruaitute chuan, Mizoram sorkar hma­lakna leh Vice Chancellor hmalak dan April 2, 2019 chawhma dar 11:30 thleng nghah an rel a; chumi chhunga thu lawmawm an hre lo a nih chuan lung­awi lohna lantir chhunzawm an tum.

ICFAI University SAC tarlan danin, kum 2006-ah Mizoram Legislative Assembly-in ‘The Chartered Financial Analysts of India University Mizoram Act, 2006’ a pass a, chu dan hmang chuan Mizoramah ICFAI University din niin, Mizorama private university awmchhun a ni.

ICFAI Society laka an phûtte
1. University dangte nena khaikhinin fee a tam uchuak a, kum tin deuh thaw (2007, 2010, 2011, 2012, 2016 leh 2018-ahte) tihsan a ni. Zirlaite tan phurrit a tling a, chhungkaw dinhmun ngaihtuah a, Mizo mipui khawsak mil tâwka fee tihhniamsak an phût.
2. Class room leh laboratory changtlung zawk leh hmantlak, department hrang hrangin an mamawh ang pek an an phût.
3. Act leh statute-a tiam a nih angin, playground leh co-curricular activities an neih theihna tur siamsak an phût.
4. University Library changtlung zawk, zirlai mamawh phuhru zo ngei lehkhabu dahsak a, zau zawka an zirna atan online journal subscribe sak turin an duh.
5. Mimal building-a zirlaite lehkha zirtir loin, ICFAI Campus chhungah ngei zirlaite an len vek theihna tura building sak belh an phût.
6. University syllabus-a awm ngei, study tour, field study leh industrial visit-ahte an mamawh tâwk sum pek an phût.