MP inthlan atana inpuahchahna thlirho

Nimin khan Lunglei leh Kolasib-ah Lok Sabha inthlanpui awm tura district pahniha general observer atana ruatte nen inthlan inpuahchahnate thlirho a ni.

Lungleiah chuan general observer Krishna Kumar chuan, inthlanna sum sensote mumal taka chhinchhiah leh ziah te, Model Code of Conduct zawm ṭhat te, party flag, banner leh poster târte leh inthlan kaihhnawiha ECI-in guidelines hrang hrang a siamte zâwm ṭheuh turin kalkhawmte a chah.

General Observer chuan, inthlana mamawh motor hman tur, security, EVM phur tur motor-a GPS vuah, polling official-te training pek, photo voter slip sem chhuah kawngahte uluk leh mumal taka ruahmanna siam turin a mawhphurtu officer-te a hrilh a; inthlan chungchanga sawisel duh leh report pe duhte tan mobile phone number 9837053603 (whatsapp) leh 6009083503 an biak theih reng a nih thu a sawi.

Meeting-ah hian Lunglei DC K Lal­rinzuali, SP C Lalthanmawia, election official leh political party hrang hrang aiawhte an tel a ni.

Kolasib-ah chuan general observer Pranaj Yadav hoin Lok Sabha inthlanpui awm tura inbuatsaihna hrang hrangte sawiho a ni a, DC Zoengsanga leh SP Vanlalfaka Ralte te pawh an tel.

Meeting-a tarlan danin, Kolasib district-a polling booth 82-te chu sector 16-ah ṭhen a ni a, vote nei mi 58,549 an awm a ni.