Meihawl leh briquette siamna hawng

Mizoram Science, Technology & Innovation Council (MISTIC) leh Baktawng Charcoal Making Society-te chuan Baktawng khuaa thing nâwi (phuai) leh favái lam chi aṭanga meihawl ṭha chi leh briquette siam chhuahna hmun, 'Sawdust Briquetting and Charcoal Making Plant' an siam chu nimin khan an hawng a, Baktawnga Chhuantharte kutah hlan nghal.

Hawnna inkhawm hi MISTIC senior scientific officer Samuel Lalmalsawma'n a kai­hruai a; Plant hawngtu Dr RK Lallianthanga, chief scientific officer leh MISTIC member secretary chuan, an thil din thar chu Baktawng khaw mipui tan a ṭangkai hle dawn tih a sawi.

Report petu MISTIC scientific officer PC Lalngilneia sawi danin, MISTIC leh Charcoal Making Society, Baktawng ten Sawdust Briquetting & Charcoal Making Machine din a nih theih nan April 2018-ah hma an la ṭan a ni.

Hawnna inkhawm­ah hian Baktawng leh Chhuanthar V/C, YMA, MHIP, MUP leh society hrang hrang - Baktawng Tea Grower Association, Aluminium Industry, Aloevera Grower Association, Carpentry Association aṭangin mi thahnem tak an tel a ni.