CAB do turin Lok Sabha inthlanpuiah Mizo mipui ṭanrual a ngai - Rajya Sabha MP

Rajya Sabha MP Ronald Sapa Tlau chuan nimin khan Lunglei Press Club-ah thuthar thehdarhtute a kâwm a; Citizenship Amendment Bill (CAB) chu Mizo hnam tan a hlauhawm êm avangin CAB kaltlangpui a nih lohna turin Lok Sabha inthlanpui awm turah Mizo mipuite ṭanrual a ṭul tak zet thu a sawi.

Ronald Sapa Tlau chuan, Lok Sabha inthlan tur chu kil hniha inbeihna a nih ber dawn thu sawiin, "Mizoram, kan culture leh kan sakhua, kan society, kan hnam a dam khawchhuah theih nan zêm khata kan lawi za a pawimawh. MNF-te hi CAB an duh loh thu sawi ve reng si a, NDA a awm reng chunga an kal lui tlat hi a pawi hle a ni," a ti.

Mizoram state assembly inthlan chu a zo tawh tih sawiin Ronald Sapa chuan, "Congress kan tla chiang hle a, he kan chak lohna hi ka pawm a ni. Tunah chuan hnung lama thil awmte hnu­chhawn a, hma lam kan thlir a ngai a, Parliament-ah NDA lamṭang kan paih thlak ngei a ngai a ni," a ti a; NDA leh NDA thláwptu MNF-te paih a ṭul thu a sawi.

Rajya Sabha MP chuan, chief minister Zoramthanga'n Prime Minister leh Home Minister a hmuhnaah, Mizoramin CAB an duh loh thu a thlen nia sawi chu awmze nei lo a nih thu leh PM-in a lo chhânna sawi tur an neih loh thu a sawi a, "Awmze nei ni se Parliament-ah sawiho turin pharh a ni lo ang," a ti.

Ronald Sapa Tlau chuan, BJP leh RSS-te'n Mizoram leilung an duh a, Mizo Kristiante erawh an mamawh lo tih sawiin, "Min chîmrala min tichimit turin Inner Line Permit-in min vêng tlat si a, ILP hlîp turin Constitution tih danglam a ngai bawk si. Kawng dang an ngaihtuah a, CAB an hmuchhuak ta a ni," a ti bawk.