Bairabi-Sairang inkar rél kawng : Kum 2023-ah siam zawh beisei

Chief secretary Lalnunmawia Chuaungo chuan North East Frontier Railways (NFR)-in Bairabi leh Sairang inkara rél kawng an siam mek nimin khan a enfiah a; hna thawktute chuan, December 2023-ah rél kawng chu siam zawh theih an beisei thu an lo hrilh.

Chief Secretary chuan, Mizoram chhungril zawka rél kawng lut tur chu nghahhlelhawm a tih thu sawiin, "Mizoram economy tan nasa takin hmasawnna a thlen dawn. Bungraw chi hrang hrangte tun aia tláwm zawk leh rang zawk daihin a lâk luh thei dawn a, kut hnathawktute tan pawh ṭangkaina nasa tak a neih dawn a, an thar chhuah phai lama thawn nasa takin a awlsam zawk dawn a ni," a ti.

Bungraw man a tlàwm bakah, khualzinte tan awlsamna a thlen tur thu sawiin Lalnun­mawia Chuaungo chuan, "Aizawl aṭanga Guwahati hah taka motor hmanga kal ai chuan rél hmanga hahdam taka zin mi tam zawkin an duh dawn a, zin chhung a rei lo zawk ang. Khawtual mite'n an chhawr ṭangkai tur thil tam tak a keng tel dawn a ni," a ti a; rél kawng siam hna thawktute chu an hna uluk taka thawk zel tur leh contractor-te hnathawh uluk taka vil turin a chah.

Chief Secretary hian rél kawng siam meka hna thawh hrang hrang te, lei dawh leh rêl chawlhmun buatsaih mekte a en a; NFR hotute'n an harsatna chinfelsak tura state sorkara an lo thlen tawh chinfel dan turte a sawipui nghal bawk.

NFR hotute sawi danin, Bairabi-Sairang rél kawng siam hna hi May 2008 khan national project zingah puan a ni a; Bairabi leh Sairang inkarah rél chawlhmun pali - Hortoki, Kawnpui, Mualkhang leh Sairangahte a awm dawn.

Hna lian tham leh hautak zual zinga 74% thawh zawh tawh a ni a, chawlhhmun pali siam hna bik chu 55% thawh zawh tawh niin, project pumpuia hna thawh tur aṭangin 57.80% zawh tawh a ni. Senso ngai zawng zawng chu cheng vbc. 5521.45 a ni a, cheng vbc. 3872.91 hman a ni tawh.

Rél kawng hi km. 51.38-a thui a ni dawn a; lei lian tham (major bridge) 55, lei tenau deuh (minor bridge) 87 leh lei verh (tunnel) metre 12,672.25-a thui a awm. March 2023-a siam zawh tura ruahman ni mah se, hun rei tak chhung zangnadawmna ngiattute'n harsatna an siam vang te, hripui léng vanga inkharkhip leh hna thawktu tur chhawr tur phurh luh kawngah harsatna a awm avangtein a hun pangaiah zawh hman a ni dawn lo. December 2023-ah zawh hman beisei a ni.

Rél chawlhhmun panna kawngpui siam dan tur endik tawh a ni tawh a, hna thawh a la ni lo. Railways ramin a huam tur chinah pawh chinfel ngai a la awm a, ramri felfai tak Railways-in an la nei thei lo a ni.