KHAWTHLIR

Sangau chhehvelah Ráltlân 400 chuang
Sangau leh a chhehvel khuaah Myanmar aṭanga ráltlân mi 400 chuang an awm mek. Sangaua MJA member FC Vanlalzawna sawi danin Myanmar aṭanga sahimna zawnga Mizorama lut mi 400 chuang zinga a tam zawk chuan an chhungte an fin a, in luaha khawsa pawh an awm nual a ni.

Thisen pe
Kolasib College NSS unit chuan nimin khan Kolasib District Hospital-ah thisen an pek chhunzawm a, mipa 12 leh hmeichhia parukte'n thisen unit 18 an pe a ni.

Magistrate thupek
Champhai district additional magistrate Henry C Lalrawnkima chuan thupek chhuahin, Champhai district-ah kawng sír, kawng síra kawr, tuihâwk luankawr leh vantlang hmunahte bawlhhlawh, leivûng leh hnawmhnawk paih phal loh a nih thu leh, tui luankawr hnawh theia in sakna bungrua leh thil dang dah khap a nih thu a tarlang. Thupek bawhchhiate chu IPC Section 188 hmanga hrem theih an ni.

Task force-te tlawh
Aizawl West-I bialtu MLA Zothantluanga chuan April 22, Ningani khan a bial chhung, Chawlhhmuna MLA fund aṭanga CCC atana thuam ṭhat Cooperative building leh a bial chhung veng hrang hranga task force duty-te a tlawh kual. CCC thuam ṭhatna tur mamawhte a pek bakah, task force-te hnenah Rs. 10,000 ṭheuh leh hand sanitiser, kutkawr leh hri thahna hlote a pe a ni. Zothantluanga hian mipuite chu Covid-19 vanga sorkarin mipuite zawm tur dan an siamte ṭha taka zawm turin leh police leh task force-te thu awih thiam turin a chah.

Army recruitment Rally thulh rih
Covid-19 hripui léng avangin May 1-8, 2021 inkara Aizawla Army Recruitment Rally neih tur chu ṭhulh a ni. Sorkar thuchhuah tarlan danin, Army Recruitment Rally neih turah hian a ṭul angin ruahmanna thar siam leh a ni ang.