LTF lehkha hmang dik lo an tam

Aizawla inkhuahkhirhna kalpui mekah, khawlaia chhuak zingah local task force lehkha hmang dik lo, an kalna tura ziah lan ni loa kal an awm nual.

Hunthar Venga LTF leh police duty-te chuan sorkar department ID nei leh LTF lehkha hmanga chhuak zingah Rangvamual lama kal an tam thu an sawi. Dan leh thupek zâwm lo an mante chu pawisa an chawitir a, zu mansak pawh an awm nual a ni.

Mizoram pumah Ningani zing dar 9 leh nimin zing dar 9 inkar khan police-te leh task force-te'n The Mizoram (Containment and Prevention of COVID-19) Act, 2020 bawh­chhia mi 390 an man a, pawisa an chawitir belhkhawm chu Rs. 65,900 a ni.

Sorkar thuchhuah tarlan danin, The Mizoram (Contain­ment and Prevention of COVID-19) Act/Ordinance hman a nih aṭanga dan bawh­chhia man tawh zawng zawng chu mi 84,844 an ni a, an pawisa chawi tlingkhawm chu Rs. 1,70,87,200 a ni.