RT-PCR chanchin ka hre zui lo - Zodintluanga, MLA

Congress Legislature Party (CLP) leader Zodin­tluanga Ralte chuan, Civil Hospital, Lunglei labo­ratory-a hman tura RT-PCR khawl a pek awm zui zel dan a hriat loh thu a sawi. RT-PCR hi Lunglei Civil Hospital-ah a awm nia thu dawn a ni.

Vanglaini palai zawhna chhangin Thorang bialtu MLA Zodintluanga chuan, sorkarin RT-PCR khawl lei a harsat thu a sawi avang leh mamawhna a sàn avangin kháwl neih belh a nih theih nan theihtawp a chhuah tih a sawi a, "RT-PCR khawl ka chah chhuah hnuah sorkar hnenah ka hlan a ni. Sorkar hnena ka hlan tawh avangin a enkawl zui zel chu an kut a ni tawh," a ti.

Zodintluanga Ralte chuan, RT-PCR khawl chu mipui tan ṭangkai taka hman ni se tih chu a duhthusam a nih thu sawiin, "Khawl ka pek hnuah hman theih turin a dahna tur siam a buaithlak thu an sawi a, ka siam ang, ka tihin sorkarin a phal chuang lo. Kei chuan tih ngaihna ka hre tawh lo," a ti a; RT-PCR khawl chu dimdawi ngai tak a nih avangin tunah a la hmantlak nge, hmantlak loh tih a hriat loh thu a sawi.

Covid-19 a lên nasat leh avangin RT-PCR mamawhna a sang zuala a hriat thu sawiin Zodintluanga chuan, "RAT hmanga endikte pawh RT-PCR-te'n endik leh zel a ngai ṭhin. Chuvangin, Lungleiah RT-PCR hi hman ve ni se chuan a ṭangkai hlein a rinawm a, he khawla endik chu rintlak thlap a nih avangin khawl danga endik zui a ngai tawh lo," a ti.

CLP Leader chuan, June 26, 2020 khan Lunglei Civil Hospital hman turin a hun laia Lunglei District Task Force chairman V Lal­sangliana, bawrhsap hnenah RT-PCR khawl a hlân a ni.

Khawl chu Lunglei Civil Hospital-a dah a nih hnu rei lo têah DC office-ah dah lêt a ni a, chumi hnuah sorkar thu angin damdawi-inah dah leh a ni. Nimin thleng khan hman lohin Civil Hospital, Lungleiah a la awm nia thu dawn a ni.