Vawk phûmna tur buatsaih

Aizawl Municipal Corporation (AMC) huam chhunga African Swine Fever (ASF) avanga vawk thite phûmna tur nimin khan Tuiriala AMC ramah laih a ni.

AH&Vety department chuan thuchhuah siamin, ASF vanga vawk thite chu uluk taka sâwngbàwla phûm zel a nih loh chuan mipui hriselna kawnga harsatna thlentu a nih theih bakah, zau zawka hri theh darhtu a nih theih thu an tarlang a, "AMC nen ṭang kawpin vawk thi phûmna tur hmun bik siam a ni," an ti.

AMC huam chhunga ASF vanga vawk thite chu a phûmna tura ruahmanah chauh phûm tur a ni a, AH&Vety department hnuaia Carcass Disposal Team kaihhruaina leh hriatpuinain phûm a ni ang.

Hri vanga vawk thi phûm tur nei chuan mobile phone number 9402113053, 9436147364 leh 9436148207-ahte hriattir tur a ni.