Ran vulh chánte ngaihven zual turin ZPM Ṭhalaiin Mizoram sorkar an phût

ZPM Ṭhalai chuan, vawk hri leng vanga Mizoram hmun hrang hranga vawk tam tak thi tuartute leh Sailulâk leh Léng khuaa chinghniain sial a seh hlum neitute chu ngaihven lehzual turin sorkar an phût.

ZPM ṭhalaite chuan thuchhuah siamin, African Swine Fever (ASF) vangin April 22, 2021 thleng khan district palia khua/veng 12-ah vawk 1,164 a thi tawh a, infected area ni loah thih dan pangngai loa thi vawk 95 a awm tawh bawk tih an tarlang a, "Vawk vulhtute thinlung takin kan tawrhpui. Vawk chántute hi zangnadawmna ṭha tak pe ngei turin Mizoram sorkar kan phût a, vawk vulhtute'n bul an ṭan ṭhat leh theihna tur ruahmanna siampui turin sorkar kan phût bawk," an ti.

Sailulâk leh Léng khuaah kumin chhung ringawtin sial vulh lai 30 vel chinghniain an seh tawh a, nikumah pawh eng emaw zat chinghnia vangin an chán tawh tih sawiin ZPM ṭhalaite chuan, "Chinghniain sial a beih avanga mangang taka awm kut hnathawktute'n nikum aṭanga vawiin thlenga zangnadawmna an la dawng lo hi pawi kan ti hle," an ti a; zángnadawmna pe thuai turin Mizoram sorkar an phût.

ZPM Ṭhalai chuan, kut hnathawktute chu ram dinchhuahna atana pawimawh ber an ni tih sawiin, "Sokar sum aṭanga hamṭhatna leh hmasawnna thawhna tur hi a dawng tur dik takte'n an dawn leh dawn loh kan thlithlai reng dawn a ni," an ti.