Hlawh lâk hun tur a hriat loh

Mizoram sorkar hnuaia hna­thawkte April 2021 thla hlawh lâk hun tur hriat theih a la ni lo. Ruahmanna siam a nih dan chuan, group C leh D-te'n an lak hmasak leh a rinawm.

Finance department aṭanga department hrang hranga hlawh siamtute'n thu an dawn danin, April thla hlawh chu group C leh D-te'n May 3, 2021 hmain an la dawn lo a, group A leh B-te hlawh lâk hun tur chu la ngaihchân tur a ni. Group C leh D-te'n May 3 hmain hlawh an la dawn lo tihna, not pay before (NPB) chu department ṭhenkhat chuan nimin khan an dawng.

Thu dawn danin, sorkar hnathawk hlawh siam a nih dawnin, department-a hlawh siamtute'n NPB an dawn phawt a ngai a, NPB milin hlawh tur Treasury-ah an thehlut ṭhin a ni.

Tarlan tawh ṭhin angin, Covid-19 a lên hnuah Mizoram sorkar hnuaia thawk group C leh D-te'n hlawh an la hmasa tlangpui a, chumi hnuah group A leh B-te'n an la ve leh ṭhin a ni.