LTF/VTF member Covid-19 dona aṭanga hripui vei thite râlna pek dan tur tichhuak

Mizoram sorkara Finance department chuan nimin khan notification chhuahin, local/village task force mi leh sa, Covid-19 kaihhnawiha an chêt chhuahna aṭanga Covid-19 vei thite hnena sorkarin ràlna Rs. 20,00,000 a pek dan tur, Ex-Gratia Lumpsum Compensation Scheme a tichhuak.

Finance notification-a a lan danin, LTF/VTF member, Covid-19 kaihhnawiha an chêt chhuahna aṭanga hripui vei leh thi zuite sorkar anga râlna pek chu April 6, 2021-a Council of Ministers meeting-in an pawm a; scheme-in a tum ber chu, sorkar laipuiin PMGKP hnuaia insurance package leh Mizoram sorkarin a hnathawkte puala Ex-Gratia Lumpsum Compensation Scheme a siamin a huam lohte'n Covid-19 donaah thlamuang leh ngaihngam taka hripui do hna an thawh theihna atana tih a ni.

Covid-19 dona lama hripui an kài palh a, nunna chán an awm chuan an chhungte hnenah Rs. 20,00,000 pek tur a ni a; sorkar aṭanga ràlna petu tur chu Disaster Management & Rehabilitation department a ni.

Scheme hian Health department-in LTF/VTF member ni tura a tihte bakah, LTF/VTF hrang hrangin hripui an donaa an thâ tichak tura member/volunteer an ruatte a huam a; mahse, LTF/VTF member leh volunteer zingah PMGKP Insurance Package leh sorkar hnathawk, sorkar scheme hmang theite erawh chu a huam lo. Task force anga an duty-na aṭanga hripui káite chauh a huam bawk.

Scheme atan hian inziah luh emaw, pawisa thawh emaw a ngai lo a, mahni khua/veng ṭheuha LTF/VTF member atana ruatna leh duty tura lehkha siamte chu inziah luh nan rin tur a ni.

He ruahmanna hian April 1, 2021 aṭanga September 30, 2021 thleng a huam phawt dawn a, sorkarin ṭul a tih chuan a pawtsei thei thung.