Covid dan zâwm lo mi 84,844 man tawh

Mizoram police-te leh hmun hrang hranga local/village task force-te chuan May 4, 2020 aṭanga nimin zing dar 9 thleng khan The Mizoram (Containment and Prevention of Covid-19) Act, 2020 bawhchhia mi 84,844 an man tawh a, pawisa chawitir tlingkhawm chu Rs. 1,70,87,200 a ni.

April 22, Ningani zing dar 9 leh nimin zing dar 9 inkar khan Covid-19 dan bawhchhia mi 390 man an ni a; chu‘ngte chu vantlang hmuna hmai tuam lo mi 296, physical distancing zâwm ṭha lo mi 38, vantlang hmuna chil chhâk mi 39 leh sorkar dan siam dang zâwm lo mi 17 an ni. Mi 390-te pawisa chawi tlingkhawm chu Rs. 65,900 a tling.

Ningani zing dar 9 leh nimin zing dar 9 inkara dan bawhchhia man zingah Aizawl district-a man an tam ber a, vantlang hmuna hmai tuamna vuah lo mi 124, physical distancing zâwm lo mi 23, vantlang hmuna chil chhâk mi 36 leh sorkar dan siam dang zawm lo mi pali, an vaiin mi 184 man an ni a, an pawisa chawi tlingkhawm chu Rs. 31,500 a ni.

Covid-19 Act hmanga hrem theihte
1. Vantlang hmuna hmai tuamna vuah lo Rs. 100 chawitir theih.

2. Physical distancing (ft. 6 aia hnaia awm khawm) zâwm lo Rs. 200 chawitir.

3. Vantlang hmuna chil chhâk Rs. 300 chawitir theih.

4. Phalna la hmasa loa sakhaw thil leh vantlang thila punkhawm huaihawt Rs. 5,000 chawi.

5. Phalna la hmasa loa ramri pêla lut leh chhuak Rs. 5,000 chawitir theih.

6. Khung hran (quarantine) tur ni si, duh lote Rs. 3,000 chawitir theih a ni.

7. Quarantine centre aṭanga awm hun a zawh hmaa chhuak Rs. 1,000-5,000 chawitir theih.

8. Quarantine-a awm laia inkaihhruaina zawm loh vanga mi dang himna tiderthâwngtu Rs. 500 chawitir.

9. Central leh state sorkarin Covid-19 donaa inkaihhruaina a siam leh inkhârkhip thupek a siamte zâwm lo Rs. 1,000 chawitir theih.

10. Covid-19 vei leh vei rinhlelhte nihna leh chanchin leh an thlalak phalna nei loa thehdarhtu thla 3 chhung tàntir leh Rs. 5,000 thleng chawitir theih.