Candidate inhnukdawk an awm lo : Postal ballot vote thlâk ṭan a ni

April 11, 2019-a Mizorama Lok Sabha inthlanpui neih tur leh Aizawl West-I Assembly bye-election neih tura nomination paper thehluttu mi pakaw zingah inhnûkdâwk an awm lo. Lok Sabha inthlanpuia state danga duty tur Mizoram police-te chu nimin khan postal ballot hmangin Assembly Annexe conference hall-ah vote thlaktir an ni.

Lok Sabha inthlanpui leh Assembly bye-election chuh tuma hming pe lutte inhnuhdawh theih hun chu March 28, Ningani tlai khan a tâwp a; Lok Sabha inthlan atana nomination paper thehluttu mi parukte leh Assembly bye-election-a chuh tuma hming pe lut mi pathumte zingah inhnûkdâwk an awm lo. A hmain hming pe lutte nomination paper-te chu Returning Officer leh Election official-te'n an lo endik tawh a, hnâwl an nei lo.

MP inthlana candidate ni tlang turte chu - Nirupam Chakma (BJP), C Lalrosanga (MNF), Lalnghinglova Hmar (Independent, Congress leh ZPM thlâwp), TBC Lalvenchhunga (PRISM), Lalthlamuani (Independent, Chhinlung Israel Peoples Convention thlawp) leh, Lalhriatrenga Chhangte (Independent)-te an ni.

Aizawl West-I Assembly constirtuency bye-election-a candidate-te chu Zothantluanga (MNF), Lalbuanga Sailo (ZPM leh Congress thlâwp Independent), leh, Zaichhawna Hlawndo (Independent - Zoram Thar)-te an ni.

Election hotute hnen aṭanga thu dawn danin, postal ballot hmanga nimina vote thlaktu police-te hi Manipur-a duty turte an ni. Manipur-ah hian Mizoram police company paruk vel an duty dawn a, vawiinah Manipur panin an chhuak ṭan ang.

Lok Sabha inthlana Mizoram pum tana returning officer Vanlalngaihsaka, Aizawl DC chuan zawhna chhangin, Mizoram pawna duty tur police-te tih loh polling official dangte chu postal ballot hmanga vote thlaktir an ni dawn lo a, vote an thlakna tur lehkha an pek hmangin an duty-na polling station-ah ṭheuh vote an thlak mai dawn tih a sawi.

Election hotute chuan, Aizawl West-I Assembly constituency chhunga vote nei, hmun danga inthlana duty turte bik erawh chu Aizawl West-I bialah bye-election a awm tel dawn avangin postal ballot hmanga vote thlâktir an ni dawn tih an sawi bawk.