Miretheite kum tin Rs. 72,000 pek turah Mizo an tel - Hawla

Mizoram Pradesh Congress Committee (MPCC) president Lal Thanhawla chuan, tun hnaia Congress president Rahul Gandhi-a'n Lok Sabha-ah Cong­ress an sorkar chuan India rama mi rethei chhungkaw tin hnenah an bank account-a kum tin Rs. 72,000 thun a nih tur thu a puan chu Mizorama mi retheite pawhin an chang dawn tih a sawi.

Lal Thanhawla hian nimin khan Congress Bhavan-a politi­cal session-ah thu a sawi a; Rahul Gandhi-a'n India mipuite a tiam, mi retheite hnenah kum tin Rs. 72,000 sorkarin a pek tur chu tihpuitlin theih ngei a nih thu a sawi a, "Minimum Income Guarantee Scheme hi Reserve Bank of India (RBI) governor hlui Raghuram Ranjan leh economist hmingthang dangte'n an zir chian hmasak leh ṭha an tih, tihpuitlin theih a ni," a ti.

MNF MP candidate C Lalro­sanga'n 'MNF sorkar thla thum thawh leh Congress sorkar kum 10 hna thawh a inhen deuh thaw' tih a sawi chungchang sawi langin Lal Thanhawla chuan, "A sawi awm tâwk vel a ni. Hetianga a sawi mai ta hi dâwt zirna sikula zirtirtute zinga a awm tâk vang a ni," a ti a; chutih laiin, MNF candidate chuan a thusawi chu a pha leh chûl tawh niin a sawi.

MPCC President chuan nationalism chungchang sawiin, nationalism chu hmûiah a awm lo a, thinlungah a awm zawk tih a sawi a, "Mizo nationalism sawi ṭhintute hi sawi tlak an ni tawh lo. Mizo nationalism sawi ṭhintute chuan June 25, 1986 khan vai lalpa Arjun Singh-a hnenah ziakin India ram nun náwlpuia inchhûn luh vek an lo tiam tawh a ni," a ti.

Aizawl khawpui laili aṭanga Assam Rifles sawn chhuah chungchangah Lal Thanhawla chuan, "Tute emaw chuan thangṭhat lak an tum a, mahse, Mizo­ram remna leh muanna lâwma prime minister Rajiv Gandhi Mizorama a lo zin khan mipui hmaah Aizawl khawpui aṭanga Assam Rifles sawn chhuah tur a puang a, chumi bawhzui chuan hmalak chhoh zel a ni," a ti a; a taka sawn chhuah hun MNF sorkar lai nen a innang fuh mai niin a sawi.

Congress President chuan, India ram pum politics-ah Congress-in hma an sawn nasa a, BJP leh an thawhpuite erawh chu an hniam tial tial niin a sawi a, "Congress tan hma lam a êng chho zel a, BJP chu an sorkar dawn lo tih a lang tawh a ni," a ti.

Inkhawmah hian John Siam­kunga pawhin thu a sawi a, Mizoram sorkarin tun hnaia 15th. Finance Commission hnena sum a lo dilnaa ruahmannate chu Congress sorkar siamsa deuh vek a nih thu a sawi a ni.