Zu khapna tur bawhzui rih lo turin Addl.CEO-in Excise deptt. a hriattir

Additional chief electoral officer (Addl. CEO) Krishna Mohan Uppu chuan Mizoram sorkara Excise & Narcotics Secretary hnenah lehkha thawnin, Lok Sabha inthlanpui kumin May thlaa a zawh hma chuan The Mizoram Liquor (Prohibition) Act (MLP Act) bawhzui lo turin a hriattir.

Additional CEO hian Excise & Nar­cotics department Secretary hnenah hian March 28, Ningani khan lehkha a thawn. Model Code of Conduct hman a nih tawh hnua Mizoram Assembly House-in zu khapna tur MLP Bill a pass chungchangah complaint an dawn thu leh, Election Commission of India (ECI) thutlukna angin MLP Bill/Act chungchang chu May 27, 2019-a Lok Sabha inthlanpui zawh a nih hma chuan bawhzui lo turin a hriattir a ni.

Tarlan tawh angin, Mizorama zu khapna tur The Mizoram Liquor (Prohibition) Bill, 2019 chu March 20, 2019 khan Assembly session-ah pass a ni a, March 26 khan Governor Jagdish Mukhi chuan pawmpuiin hming a ziah hnan tawh a ni.

Hetih lai hian, Food, Civil Supplies & Consumer Affairs department-in tun hnaia chini sem chungchanga notification/order a chhuah chu Model Code of Conduct bawhchhiatnaa ngaih a nih avangin, Election department chuan insawifiah turin FCSCA department a hriattir tawh a; Election Commission of India thu nghah mek a nia thu dawn a ni bawk.