KHAWTHLIR
Thisen pe
Serchhip Vengchung Branch KṬP chuan nimin khan an kohhran hall-ah blood donation camp an huaihawt a, Serchhip District Hospital (JN Hospital) tan in thisen unit 25 an pe a, a petute mipa 19 leh hmeichhia paruk an ni.
Bike chesualah thi
March 28, Ningani zan dar 12 vel khan Thenzawla Aizawl-Lunglei kawngpui kama R Lallura Filling Station bulah Karizma bike MZ-01 E-9899, Richard Lalchhanhima (21) s/o Vanlalkima, Thenzawl Tualvungi Veng khalh chuan kawngpui sîra truck ding lai a sû a; Richard Lalchhanhima chuan hliam na tak a tuar a, a hliam tuar loin nimin zing dar 3:30 vel khan Thenzawl damdawi-inah a thi. Bike hnunga chuang bike neitu Jacob Laldingliana a hliam bawk.
Mock drill nei
National Disaster Management Authority (NDMA) leh Serchhip District District Disaster Management Authority (DDMA) buatsaihin nimin khan North Vanlaiphai khuaah khuarel chhiatrupna thleng thulha chhanchhuah hna thawh dan tur tih chhinna, mock drill neih a ni. Mock drill hi N. Vanlaiphai SDO(C) Dorothy Muansangi hoa neih a ni a, a hlawhtling hlea hriat a ni.
DC-in khap
Lunglei DC K Lalrinzuali chuan, vawk natna Porcine Reproductive and Respiratory Syndrome (PRRS) a lêng mek tih AH&Vety department aṭanga a hriata nih avangin, Lunglei district chhungah hmun dang aṭanga vawk lak luh te, an district aṭanga hmun danga vawk lak chhuah te, vawk thi phûm loa paih te, vawk damlo hralh leh vawk hrisel lo talhte khap a nih thu a puang. Thupek hian thla hnih chhung a awh dawn a ni.
In kâng ral
Nimin chhûn dar 12 vêl khan Sihphir Venghlunah Dimi w/o Nangkhansawma in chu a kâng a, bungrua chuh hman lohin a kâng ral. Kangmei chhuah laiin in neitute inah an awm lo a, a kan chhan hriat a ni lo.
Public meeting
MZP General Headquarters hruaitute leh Bawm Students' Association chuan Ningani zan khan CADC area-a Mizoram chhim tâwp khua, Parva-ah vantlang inkhawm an buatsaih a; BSA Parva branch vice president Zonunmawia'n kaihruaiin, MZP president L Ramdinliana Renthlei bakah, BSA aiawh leh Páng Zirlai Pawl aiawhte leh khawtlang hruaitute'n thu an sawi.