Bru-te vote thlâk dan tur chungchangah CYMA hruaitute'n CM Zorama an kâwm

Central YMA office bearer-te chuan nimin chawhnu khan chief minister Zoramthanga chu a pisaah an kâwm a; Mizoram Bru, Tripura relief camp-a awm mekte chu Lok Sabha inthlanpuiah vote an thlak dawn a nih chuan, an awmna polling station ṭheuhah vote thlaktir ni se an duh thu an an hrilh.

Chief Minister an hmuh­naah hian CYMA general secretary Lalhmachhuana'n an thu thlente a sawifiah a; Tripura-a awm mek Mizoram Bru-te chu April 11-a Lok Sabha inthlan turah vote an thlak duh a nih chuan, vote an neihna polling station ṭheuhah vote thlaktir ni se an duh thu a sawi rualin, Kanhmunah vote an thlakna tur bik special polling station siam an duh lo thu a sawi.

Central YMA hruaitute chuan, Mizorama let duh loa Tripura-a awm lui tlat Bru-te chu inthlannaah mi bik (special) an nihna a awm lo tih sawiin, an tana duhsakna bik lantir an remti tawh lo tih an sawi a; an duh loh anga thil a kal a nih chuan, Lok Sabha inthlan chu boycott an tum thu Chief Minister an hrilh a ni.

Bru-te vote thlaktir dan turah hian Vanglaini palai zawhna chhangin CYMA vice president R Lalngheta chuan, Joint NGO duh dan anga Bru-te vote an neihna polling station ni loa vote thlaktir an nih dawn chuan, Lok Sabha inthlan chu boycott an la tum reng thu a sawi a, "Kan dinna ngai rengah kan la ding," a ti.

CYMA hruaitute hian Lammual chhehvela Assam Rifles rama mimalin ram an lo neih chungchanga an duh dan leh ngaihdante CM an hrilh bawk a; R Lalngheta chuan, "CM hnenah hian AR ram chhunga mimal ram nei list kan neihte kan thehlut a, AR chhuahsan tur ram hi mimal kuta a luh kan remti lo," a ti a, mimala nei an awm chuan kan dodal tlat dawn tih a sawi.

Chief Minister hmuhnaah hian CYMA Vice President leh General Secretary bakah, assistant secretary Peter Chhakchhuak leh treasurer Lalrochuanga te an kal a ni.