Chak duh luat vanga INC thawhpuiah puh

MNF vice president Dr R Lalthangliana chuan Lok Sabha inthlan atan a bial, South Tuipui constituency chhungah a campaign mek a; Ningani zan khan Cherhluna vantlang inkhawmah thu sawiin, ZPM-te chu chak duh luat vanga mipui hnâwl hnu Congress party thawhpuiah a puh.

Dr R Lalthangliana chuan, Zoram mipuiin an hnâwl hnu, MLA panga chauh nei tawh Congress party-te ZPM-in an thawhpui thei chu an dinna a ngheh lohzia tichiangtu nia sawiin, "Chak duh luat vanga zu zuar party puih ngawt hi a principle neih loh thlak a ni," a ti a; a ṭul hunah chuan opposition-ah pawh awm ngam leh MLA pawh nih loh ngam a pawimawh niin a sawi.

R Lalthangliana chuan, Mizo­ram sorkarin Hnahthial district a tihpuitlin tur chuan thil tam tak a keng tel dawn tih sawiin, chu chu MP inthlanah chakpui tham tura a ngaih thu a sawi a, "MP inthlan turah Pu C Lalrosanga, Pathian ṭih tlat mi kan thlan tlin chuan tun hmaa MP kan neih ang mai mai ni lo, danglam bik a ni ngei ang. Kristianna leh sakhaw vawnghim tlat tur, sap ṭawng leh vai ṭawnga duh tâwka Parliament-a thu sawi thei tur a ni," a ti.

Dr R Lalthangliana chuan, Delhi-a a zin hnuhnun ber ṭumin RIPANS-a khum 100 awm theihna tur damdawi-in, speciality hospital din a nih theih nan sorkar laipuia Health Secretary a hmu a, cheng vbc. 480 a sanction sak nghal niin a sawi bawk.

MNF Vice President hian Ni­ngani zan khan Cherhlun bakah Bual­pui-H khuaah thu a sawi a; nimin khan Ngharchhip, New Nghar­chhip, Tarpho, Tuipui-D leh Darzo-ahte thu a sawi leh a ni.