Lawngtlaia bank hnathawkte thlirho

Lawngtlai District Consul­tative Committee, District Level Review Committee leh District Level Security Committee chu an chair­man Shashanka Ala, Lawngtlai bawrhsap hoin DC Conference Hall-ah nimin khan an ṭhu a; lead bank office, RBI aiawh, NABARD aiawh, bank hrang hrang leh line department aiawhte an tel.

Meeting-ah hian October - December, 2018 chhunga Lawngtlai district-a bank hrang hrangte hnathawh thlir let a nih bakah, hmachhawp leh hmalak zui dan turte sawiho a ni. Bank leh mipui sum vawn himna (security) lam te, sum lêng vel (currency management & remittance), khua leh tuite hamṭhatna atana sorkar laipui ruahmanna hrang hrang - Stand-Up India, PMAY (Housing for All) leh women self help group lama bank hmalak dante sawiho a ni bawk.

Credit deposit (CD) ratio leh non-priority loan chungchangah, Lawngtlai district-a bank-te'n an ti ṭha thawkhat a, agriculture kaihhnawih loan pek chhuah lamah erawh ṭan lak a ngaih thu sawi lan a ni.