Aizawlah November 9 thleng Inkhàrkhip hun pawhsei a ni
Health minister Dr R Lalthangliana hoa nimina Secretariat conference hall-a sorkar hotute ṭhukhawm chuan, tukin zing dar 4:30-a tàwp tur Aizawl Municipal Corporation (AMC) huam chhunga inkhàrkhip chu November 9, 2020 zing dar 4:30 thleng pawhsei an rél.
Ṭhutkhawmah hian Home minister Lalchamliana, Covid-19 Medical Operation Team chairman Dr ZR Thiamsanga, MLA, chief secretary Lalnunmawia Chuaungo, sorkar official, Mizoram Kohhran Hruaitu Committe, Joint NGO Coordination Committee leh Indian Medical Association hruaitute an tel.
Covid-19 hri kai ni lo, natna dang nei damlote ngaih pawimawh a ṭul thu te, chu'ngte tan chuan hmanhmawhthlak bik thila biak tur helpline siam a ṭul thu te, sorkar laipui thupek angin health sub-centre leh upper primary health centre-te pawh hawn chhunzawm a ṭul thute tarlan a ni.
MKHC kaihhruainain TV kaltlangin programme siam ṭha an ti a; programme siam a nih chuan Mizoram mipui Covid-19 laka an him theih nan leh ramri buai ṭha taka chinfel a nih theih nan ṭawngṭai rual ni se, an ti.
Integrated Disease Surveillance Programme (IDSP) report-a a lan danin, October thla chawlhkar hnuhnung ber (October 25-31) chhung khan Mizoramah swab sample 9,781 endik a ni a, hripui vei mi 309 hmuh chhuah a ni. Mi 309 zinga 121 (39.15%) chu natna lang chhuak (symptomatic) an ni a, mi 188 (60.84%) chu natna lang chhuak lo an ni thung. Aizawla local council (LC) 83 awm zinga LC 54-ah hripui vei hmuh a ni.
Covid-19 positive hmuh tawh mi 2,757 zinga 1,654 chu Mizoram páwn aṭanga rawn lut an ni a, mi 1,103 chu Mizoram chhunga kái an ni. Mi 2,757 zinga 94.45% chu civil mi an ni a, 3% chu sipai chi hrang hrang niin, hripui donaa thawk 2.54% an tel bawk.
Inkài chhàwnna ṭhenkhat
• Zirna-in kaihhnawiha kai mi 119.
• Damdawi-in leh a chhehvela hmuh chhuah mi 48.
• Office aṭanga kái mi 45.
• Zaipawl hla zirna hmun pahniha inkài chhâwng mi 18.