Covid-19: Mizoram dinhmun Chhuahtir tawh zat 84.88%
November 1, Pathianni khan Mizoramah Covid-19 vei hmuh chhuah a ni lo a, niminah mi eng emaw zat hmuh chhuah a ni. Nimin khan hripui laka fihlîm tawh mi 24 chhuahtir an ni a; Mizorama Covid-19 positive hmuh tawh mi 2,765 zinga mi 2,347 (84.88%) an chhuak tawh.
Sorkar thuchhuah tarlan danin, Pathianni khan ZMC laboratory-ah swab sample endik a ni lo a; TrueNAT-PCR hmanga district pangaa sample 83 leh RAT hmanga district palia sample 67 endik zingah hripui vei hmuh a ni lo.
Hripui vei State Referral Hospital-a enkawl, hri laka fihlim tawh Pathiannia chhuahtir mi pali zinga pakhat chu October 20, 2020-a ZMC-a RAT hmanga endiknaa positive, report la dawn loh a ni tih hriat chhuah a ni a; hei vang hian positive hmuh chhuah tawh zatah belh a ni.
Niminah Covid-19 positive hmuh chhuah an awm nual. Hriat theih chinah nimina RAT hmanga endikah Dinthar veng mi pariat hmuh chhuah an ni. Anni hi chhungkaw pahniha mi an ni a, symptom an neih vanga endik niin, a naupang ber kum 12 leh upa ber kum 62 a ni.
Nimin khan hripui laka fihlim tawh CCC hrang hrang - BSUP, Durtlang aṭangin pariat, Lunglei Sazaikawn aṭangin pahnih, Kolasib SIRD aṭangin panga, Serchhip Nursing School leh Lawngtlai aṭangin pathum ve ve, Mamitah pakhat leh home isolation-a pahnih chhuahtir an ni. Pathiannia chhuahtir, nimina Vanglainia tarlan hman loh mi 24 an awm a, Pathiannia chhuahtir zat chu 32 a ni.
Mizoramah Covid-19 positive mi 2,765 hmuh chhuah a ni tawh a, mipa 2,136 leh hmeichhia 629 an ni a; Mizoram pawn aṭanga rawn lut mi 1,660 leh Mizoram chhunga kái mi 1,105 an ni. Mi 2,757 zinga mi 2,347 (84.88%) chu chhuahtir an ni tawh a, mi pakhat (0.04%) thi tawhin, enkawl mek mi 417 (15.08%) an awm.