Group C & D hlawh tur buaipui ṭan; A&B hlawh lak hun tur a la hriat loh

Mizoram sorkar hnathawk group C leh D-te October thla hlawh tur chu nimin khan sorkar department-te'n Treasury-ah an thehlut ṭan. Group A leh B-te hlawh tur bill thehluh hun tur erawh chu hriat theih a la ni lo.

Vanglaini thu dawn danin, thla dangah chuan hlawh tur hi ni 20-22 inkar velah thehluh ṭhin a ni a, October thla hlawh tur pawh department hrang hrangte chuan ṭum dang angin October 20 velah an thehlut hlawm.

Treasury-te chuan October 26 khan department-a sum khawihtu Drawing and Disbursing Officer (DDO)-te hnenah hriattirna a tichhuak a; sorkar sum harsatna avangin October 2020 hlawh atan sorkar hnathawk group A leh B-te hlawh tur bill thehluh tawh chu la lêt turin a hriattir a ni.

Group A leh B-te hlawh tur lakna tur bill thehluh tawh lâk lêt a nih avang hian department-te chuan group C leh D hlawh tur bik bill chu a hranin an siam leh a ngai a, chumi chhung chuan inkhàrkhipin a nang a, bill an thehlut mai thei lo.

Finance department chuan October 27 khan office order tichhuakin, Aizawl South leh North Treasury-a thawktute chu November ni 2 leh ni 3-ah office kal turin a hriattir. Order ang hian nimin aṭang khan Treasury-te chu hawn a ni a, department-te pawhin group C leh D hlawh lakna tur bill an thehlut ṭan nghal a ni.