KHAWTHLIR

Thisen pe
Inrinni khan KṬP, Upper Republic Branch chuan Aizawl Civil Hospital tan thisen unit 52 an pe a, petute mipa 40 leh hmeichhia 12 an ni. KṬP, Nursery Veng Branch pawhin an din champha vawi 28-na pualin Synod Hospital tan unit 31 an pe a, petute mipa 23 leh hmeichhia pariat an ni. Lawngtlai Auto Rickshaw Owners Association chuan an din champha lawm nan District Hospital-ah thisen unit 12 an pe bawk.

Damveng tlawh
Covid-19 vei mi 26 awm mekna Damveng chu nimin khan Aizawl mayor Lalrinenga, deputy mayor R Thanglura, bialtu councillor Malsawmzuala Ralte leh Ward-XVII councillor David Zohmangaiha ten an tlawh a, AMC aṭangin a ṭul anga hman turin local task force hnenah Rs. 10,000 an hlân. Damvengah hian tun hnai bikah nimin thleng khan hripui vei mi 39 hmuh a ni tawh a, mi 13 chhuak tawhin, enkawl mek mi 26 an awm a ni.

Chetsualnaah thiṬ
Nimin chhun dar 1:30 vel khan Zokhawthar khaw chhungah truck MZ-01 T4244 chesualin, ft. 20 vel a lum a, chetsualna hmunah a khalhtu a thi. Thu dawn danin, truck hi Mawia, Bawngkawn Brigade ta a ni a, a khalhtu chu Kolasib College Veng lam mi a ni. Truck-a chuang ve dang, Lalventluanga, Khawrihnim, Salem Veng, Aizawla khawsa mek nia insawi erawh chu a hliam na lo thung.

Covid-19 vangin Mizo nu a thi
Zasangi (74) m/o Lalnuntluangi, Laipuitlang, Aizawl chu April 23, 2021 zan dar 7:30 vel khan Tata Medical Centre, Kolkata-ah Covid-19 vangin a thi. Thu dawn danin, Zasangi hi chuap cancer niin, April 14, 2021 khan zai a ni a, zai a nih hnuah Covid-19 positive a ni tih hmuh chhuah a ni.

SRH-ah mi 50 awm
State Referral Hospital-ah Covid-19 vei mi 50 enkawl mek an ni. SRH-ZMC Bulletin tarlan danin, mi 50 zinga pali chu ICU-ah an awm a, an zinga pahnih chu ventilator hmanga enkawl an ni a; mi dang zawng ward-ah awmin, harsatna lian tham nei an awm lo.