Cabinet minister hlui Zoram Sangliana vui a ni

Mizoram minister hlui PC Zoram Sangliana (65) h/o Lalthlamuani, Kanan Veng, Aizawl chu April 24, Inrinni tlai dar 5:20 khan Covid-19 avangin State Referral Hospital (ZMC)-ah a thi a, nimin khan vui a ni.

Thu dawn danin, PC Zoram Sangliana hian Covid-19 a vei tih April 14, 2021 khan hmuh chhuah a ni a, symptom a neih avangin SRH-ZMC-ah dah luh nghal niin, ICU-ah enkawl zui a ni.

Hun eng emaw chen ICU-ah ventilator nen enkawl a nih hnuah Inrinni tlai khan a thi ta a ni.

May 9, 1956-a Saituala piang PC Zoram Sangliana hi YMA, zirlai pawl leh ram hruaitu a ni ṭhin a, MLA-ah ṭum nga thlan tlin a ni tawh. Kum 1987 inthlanpuiah Tlungvel bial aṭangin a vawi khat nan MLA atan thlan tlin a ni a, kum 1987-ah leh 1993-ah Tlungvel bial aṭang thoin thlan tlin leh a ni. Kum 2008-ah leh kum 2013 inthlanpuiah Kolasib bial aṭangin thlan tlin leh a ni bawk.

PC Zoram Sangliana hi kum 1993 khan minister of state a ni a, Sports & Youth Services leh Art & Culture department-te a enkawl bakah, department dang ṭhenkhatah chief minister a pui tel. Kum 2008-2013 inkar khan cabinet minister a ni a, Art & Culture, Prin­ting & Stationery leh Transport department-te a enkawl a ni.