Mamawh khawp tui pump tur A awm loh a hlauhthawnawm

PHE department hotute chuan engineer-in-chief C Lalremsiama hoin April 24, Inrinni khan thuthar thehdarhtute Tlawng lui, Reiek kâi an tlawhpui a, tui dinhmun an enfiah. PHE hotute chuan, tui a kâm nasat avangin mamawh khawp tui pump tur a awm loh vat an hlauhthawn thu an sawi.

PHE hotute sawi danin, Tlawng lui Reiek kài aṭang hian Greater Aizawl Water Supply Scheme (GAWSS) phase-I leh phase-II hmangin tui pum ṭhin a ni a; SIPMIU-in an buatsaih mek phase-III hmanga tui pump tur pawh hmun dang aṭanga luang khawm awm belh mah se, a innghahna ber tur chu Tlawng lui a ni.

Tlawng luiah hian kum 2019 khan tui luan tlem lai ber chuan MLD 70.742 a ni a, kum 2020-ah MLD 65.97 niin, kuminah chuan MLD 31.461 chauh a ni. Hetih lai hian, GAWSS Phase-I in MLD 10, Phase-II in MLD 24 a pump thei a, Phase-III chu MLD 37 pump thei tura siam a ni.

C Lalremsiama chuan, phase I leh II chu kháwl a hlui deuh tawh avangin a tìra ruahman ang zat tui a pump thei tawh lo tih sawiin, "Khawl hi la thar deuh chu ni se mamawh ang pump tur a awm tawh dawn lo tihna a ni. Phase-III peih a nih hunah phei chuan kan buai a hlauhawm khawp mai, a chhan chu Tlawng lui hi a rin chhan lian ber tur ve tho a ni," a ti.

PHE department hotute chuan, phase-I atana tui pump-na chu Serlui aṭanga tui luangin a fin thu sawiin, "A hnârah bawlhhlawh an paih nasat avangin tui a bawlhhlawh a, pump tlak lohte'n a awm ṭhin. Tui hna humhalh mai bakah, lui tui tibawlhhlawh thei tura bawlhhlawh kan paih loh a ṭul tak zet," an ti a; tuihna humhalh a nih loh chuan tui in turah harsatna tawh a hlauhawm thu an sawi.

GAWSS Phase-II atan tui pump khawl thar an neih thu sawiin PHE hotute chuan, "Khawl thar hi thlak theih reng a ni. Mahse, tunlaiin tui a harsa si a, a thlakna atan kar khat vel a ngaih avangin kan thlak ngam rih lo. Fûr a thlen a, tuia mipui an harsat loh deuh laiin kan thlak ang," an ti.

PHE hotute chuan tunlaia tui a harsat chhan sawiin, "December 2020 chawhnu lam aṭangin ni tin electric load shedding darkar 5 vel a awm ṭhin a, diesel hmanga pump ni mah se, ni tin litre nuai 24 velin tui pump chhuah a tlem a ni," a ti a; February 23, 3021 aṭanga March 13, 2021 thleng khan PHE Water Pumping Station châwmtu Luangmual transformer a chhiat leh thu an sawi.

PHE department hotute chuan, April 17, 2021-ah tui pump khawl, electric motor a chhiat thut avangin ni li chhung tui pump a khaihlak tih sawiin, "April 4 leh 16-ah electric panel leh soft starter a chhia a, ni khat tui pump a khaihlak. Hei bakah hian, March 30 khan thliin Luangmual transformer leh kan tui pump-na inkara power line a tichhia a, ni hnih chhung tui pump a buai phah bawk," an ti.