Lungleia ram kâng ṭhelh mih a la ni lo : Bungtlang South-ah in 12 a kâng ral

April 24, Inrinni zing dar 7:30 vel aṭang khan Lunglei khawpui hmarthlang lam Saisih ram aṭangin kângmei a chhuak a, he chanchin ziahlai thleng hian ṭhelh mih a la ni lo a, Indian Air Force (IAF) pun an ni. Hetih lai hian, nimin khan Bungtlang South-a ram kângin khaw chhung a thleng a, in 12 a kâng ral.

Bungtlang South aṭanga thu dawn danin, nimin chhun dar 1 vel aṭang khan Bungtlang South khaw bulah ram a kâng a, chu chuan khaw chhung kâng kaiin, chenna in a man kai a, in 12 kang ral vekin, in pahnih chu a kan ral hmain ṭhelh theih a ni.

Khawtlangin kâng ṭhelh tum mah se, kângmei a chak êm avangin ṭhelh mih mai theih a ni lo. Mihring thi leh hliam tuar an awm lo a, bungrua ṭhenkhat an chuh hman. Kangmei hi a la chhuak zeuh zeuh reng a, heivang hian khawtlang mipuite chu inralring rengin an awm bakah, kangṭhelh motor thuneitute'n an chhawp a ni.

Central YLA hruaitute chuan nimin khan Bungtlang South an pan nghal a; bialtu MLA C Ngunlianchunga pawhin Bung­tlang South-a kângmei tuarte chu a theih ang angin chhawm­dawl an nih tur thu a sawi.

Lunglei aṭanga thu dawn danin, Lunglei Saisih ram a kan hnuah Venglai thlânmual leh Chanmari leh Zotlang zâwna khàmte a kâng leh a, nimin chawhma dar 11 vel aṭang khan a kâng nasa zual. Fire & Emergency Service leh mipuiin kâng ṭhelh tumin an bei a, he thu ziah lai hi chuan a ziaawm deuh tawh.

Lungleia Fire & Emergency Service hian kângṭhelh motor pahnih chiah an nei a, mimal tui phurte'n tlawmngaiin kângṭhelh motor-a hman/dah tur an châwi a, BSF leh Assam Rifles-te pawhin an tui phur motor-te an thawhchhuahpui.

Hmun ṭhenkhatah chuan kângmeiin in a man kai hlauhthawn thilah bungrua thiar chhuah a ni a, in pahnih chu kâng kái hman mah se, a kan nasat hmain ṭhelh mih a ni. Hmun ṭhenkhatah chuan khaw chhunga kângmei a luh lohna atan a kan kai awlsam turte hâl khalh a ni.

Kâng ṭhelhna atan tui an hman nasat avangin khaw chhung hnaiah tui châwi tur a awm meuh tawh lo a, Mat, Kawlbem leh Ṭhaizawl aṭangtein tui phurh a ni. He thu ziah lai hian ram lamah chuan kângmei hi a la nasa a, khaw chhung a luh erawh a hlauhthawn awm rih lo. Chutih rualin, nasa zawka la kang thei a nih avangin Fire & Emergency Service leh mipui an inrálring reng thung.

Thuthar thehdarhtute zawhna chhangin College Veng VC president H Darzinga chuan, kângmei chhuah chhanah hian mi pahnih rinhlelh an neih thu a sawi a, "Finfiahna kan la neih loh avangin kan la sawi chiang ngam lo," a ti.
Lungleiah hian Fire & Emergency Service-ah thawktu 17 an awm mek a, kâng ṭhelh tura inzir chhuak chu pariat an ni. Hetih lai hian, nimin khan Aizawl aṭangin Fire & Emergency Services mi leh sa paruk leh kang ṭhelh motor Lungleiah tirh an ni.

Nimin khan Mizoram sorkar chuan thuchhuah siamin, Lungleia kângmei chhuak ṭhelh turin Indian Air Force (IAF) hotute biak a nih thu a tarlang a, "Lunglei ram kâng ṭhelh tura hmalakpui turin an ngen a, IAF chuan puih an inhuam thuin an chháng. CM ruahmannain Chief Secretary leh official dangte leh IAF hotute hian rang takin hmalak dan tur an sawiho zui a, ruahmanna an siam nghal a ni," a ti.

Ministry of Defence chuan pawhin nimin tlai khan thuchhuah siamin, Mizoram sorkar ngenna angin Lunglei ram kang ṭhelh tur hian helicopter pahnih (Mi -17V5) tirh a nih dawn thu an tarlang. He thuziah lai thleng hi chuan helicopter hi a la rawn thleng lo.

Chief Minister chuan, Lungleia ram kâng chu pawi a tih thu sawiin, "Sorkar chuan theihtawp a chhuah dawn a ni," a ti a; kângmei ṭhelh tura pên chhuakte huaisenna chu fakawm a tih thu leh lawmawm a tih thu a sawi a ni.