Aizawlah bawlhhlawh thliar ṭan a ni Ṭawih thei lo zingah lehkha dah tur

Aizawl khawpuia bawlhhlawh paih buaipuitu Aizawl Municipal Corpo­ration (AMC) chuan bawlhhlawh ṭawih thei leh ṭawih thei lo thliar hran chu nimin aṭang khan a takin a kalpui ṭan. AMC chuan bawlhhlawhte chu ṭha taka thliar hrang turin an ngen a, lehkhate chu ṭawih thei loa dah turin an chah.

Aizawla bawlhhlawhte chu Solid Waste Management Rules, 2016-in a phût angin Solid Waste Management Center (SWMC), Tuirialah paih vek tawh tur a ni a; a nih dan tur ang taka sâwngbâwl leh enkawl a nih theih nan AMC chuan bawlhhlawh ṭawih thei, ṭawih thei lo, plastic, e-waste leh mihring tana hlauhawm theia ngaih hazardous waste-te chu thliar hran tur a ni.

Lehkhate chu ṭawih thei loah dah tur a ni a; hemi chungchangah hian AMC deputy mayor Lalringliana chuan, bawlhhlawh ṭawih thei ho chu leiṭha (fertilizer) atan siam tur a ni a, lehkhaa thil chhutna tui (chemical)-in leiṭha a tihchhiat theih avang leh, lehkha tihkhawngna turin sarâng pan tê hman a nih ṭhin avangin ṭawih thei lo zinga telh turin an ti ta tih a sawi. 

Ṭha taka bawlhhlawh thliar hran a nih theih nan AMC chuan Aizawla local council tinte chu tih dan tur a lo zirtir tawh ṭhin a, AMC councillor leh official-te'n mipuiah awareness campaign a nei ṭhin bawk. August 2019 aṭangin LC pakuaah enchhinna atan kalpui ṭan a ni a, October 2019 aṭangin LC dang 10-ah kalpui leh a ni bawk.

Bawlhhlawh paihna leh sâwng­bàwlna hmun SWMC, Tuirial chu December 11, 2019 khan UDPA department enkawltu deputy chief minister Tawnluia’n a hawng. SWMC hi SIPMIU-in an siam a ni.

SWMC-ah hian December 16, 2019 aṭangin LC 19-a bawlhhlawhte paih ṭan a ni a, February 2020 aṭangin LC 38-a bawlhlawhte dah luh belh leh a ni. March 2020 aṭangin Aizawl khawpui veng tina bawlhhlawh zawng zawng dah luh tum ni mah se, Covid-19 léng avangin ruahman anga kal theih a ni lo.

Kumin August thla tìr khan SWMC-a bawhhlawh la dah luh ve lohna LC 26-a member-te chu bawlhhlawh thliar chungchangah training neihpui an ni a, August 28-ah LC 57-te 'Re-sensitization on Segregation of Waste' neihpui leh a ni. October 26-29 chhung khan LC 26 huam chhunga tlawmngai pawlte nen bialtu councillor hoin awareness campaign neih tum a ni a, mahse, inkhàrkhip avangin beisei anga hmalak theih a ni lo.

Aizawl khawpuia bawlhhlawhte hi public private partnership (PPP) mode-a paih a ni a, a paihna senso zinga 80% chu AMC-in tumin, 20% chu LC-te'n an tum thung. PPP mode-a bawlhhlawh paihna atan hian AMC chuan thla tin cheng nuai 50 vel a hmang ṭhin a ni.