Inkhuahkhirhna pawhsei a ni

Mizoram sorkar chuan April 20-26, 2021 chhunga inkhuahkhirhna a kalpui chu chawlhkar khat chhung atan a pawtsei. Hemi chungchangah hian Disaster Management & Rehabilitation (DMR) department chuan April 24, Inrinni khan thupek (order) a tichhuak a ni.

DMR department chuan, April 19, 2021-a Covid-19 chungchanga inkaihhruaina, Standard Operating Procedure (SOP) tihchhuah tawh chu tlemtê tihdanglamin, May 3, 2021 zing dar 4 thleng hman zui tur a nih thu a tarlang a ni.

SOP tharah chuan, board exam, all India level exam leh recruitment exam kal lai mekte chu phalsak an ni, tihah, 'SOP ṭha taka zawm tur a ni a, exam huaihawttute'n mawh an phur ang. State sorkar hnuaia exam ruahmanna lo awm tawh la ṭan lohte chu sawn hlat (postpone) tur a ni,' tih belh a ni.

AMC leh district head­quarters-a mipui veivah­na chungchangah, 'Ṭul bik thil vanga chhuah ngai - damdawi lei tur, ni tin mamawh lei tur leh inentir turte chuan an awmna VTF/ LTF phalna an la hmasa tur a ni a, ni tin mamawh lei turte hian mahni awmna veng VTF/LTF ruahmanna zawm ngei tur a ni' tih dah belh a ni.

Phalna neia kalpui theih zingah, LTF/VTF ruahmanpuinaa dawr hawn theih zinga pangpar zawrhna dawr telh chu paih a ni a; 'Cold sto­rage leh warehousing (bungraw chhêk khawlna godown) service' theih tihah, 'khawpui chhunga bungraw sem kual leh khaw danga bungraw thawn kualte a huam ang,' tih dah belh a ni bawk.