Kum 18 chung lam Covid vaccine pek turah a man a awm mai thei

Health minister Dr R Lalthangliana chuan April 24, Inrinni khan Lengpuiah Covid-19 veite enkawlna hmun, Lengpui Middle School-I a tlawh a, khawtlang hruaitute nen an inkâwm. Minister chuan, kum 18 chin chung lam hnena Covid vaccine pek turah a man a awm mai theih thu a sawi.

Lengpui MS-I hi hripui vei mi 50 vel awm theihna tura ruahman a ni a, hripui vei mek mi 20 chuang an awm mek. Minister chuan, task force-te enkawl tura Covid vei dahna atan MS-I ruahman a ni chu lawm­awm a tih thu a sawi.

Dr R Lalthangliana chuan, Inrinni chawhma dar 10 thleng khan Mizo­ramin Covid vaccine 2,99,870 a dawng tawh tih sawiin, "Ni khatah mi sing khat aia tlem lo kan pek dan a ni tlangpui. Nimin (April 23) thleng khan mi 2,02,975 hnenah vaccine pek a ni tawh a, first dose la tawh chu mi 1,62,463 an ni," a ti. 

Health Minister sawi danin, India ram pumah 25% vel hnenah Covid vaccine pek a ni tawh a, Mizoramah chuan kum 45 chin chung lam 41.83% pek an ni tawh. Vaccine hi kum 45 chin chung lam chu a thlâwna pek zel a ni.

Covid vaccine pek vanga taksaah harsatna lian tham nei report a la awm lo tih sawiin Minister chuan, "Vaccine lak hi hlau loin intihhmuh ang u. May 1 aṭang chuan kum 18 chin pe turin Central-in ruahmanna a siam tawh a, hei hian man a nei mai thei a, Central-in ngaihtuahna a séng mek a, thu chiang nghah mek a ni," a ti.

India ram hmun ṭhenkhatah oxygen harsatna an tâwk tih sawiin Dr R Lalthangliana chuan, "Mizoramah chuan tuna kan dinhmunah chuan harsatna lutuk kan nei dawn loin ka hria," a ti a; private-a ogygen siamte an awm avangin oxygen-ah mipui chîâina tur a awm rih lo tih a sawi.