Mumbai-ah kal rih lo turin ngen

Mumbai Mizo Association (MMA) chuan April 24, Inrinni khan thuchhuah siamin, Mumbai khawpui bakah, Maharashtra state pumah Covid-19 a lên nasat avangin hna thawk tura Mumbai-a kal rih lo turin Mizo mipui an chah.

MMA chuan, Maharashtra chu Covid-19 hluar berna pakhat a ni tih sawiin, "Damlote tan enkawlna a indaih séng ta lo. Mumbai-a Mizo awm mekte pawhin harsatna kan tâwk ṭan ta a, eng chen nge kan la buai dawn a, eng ang harsatna nge kan tawn dawn hriat a har ta hle. Hetiang dinhmun hi a nih avangin kan him tlân zawk nan leh harsatna kan tawh loh nan Mumbai-a hna thawk tura kal tumte chu kal rih lo turin kan ngen a che u," an ti.

Bangalore Mizo Association pawhin thuchhuah siamin, Bangalore-a awm Mizote chu Karnataka sorkarin curfew, lockdown, etc. a kalpuia inkaihhruainate chu zâwm turin an chah. Covid-19 laka invènna ngai pawimawh tur te, a huhoa thil tih nei lo tur te, páwna chhuah a ṭul pawhin public transportation hmang lo tur te, ei leh in chhe mai thei lo chi a theih ang anga inlam khawm lâwk turtein an chah a ni.