April & May-a ZMC-a hman turin FK Oxygen Plant-in oxygen pe

FK Oxygen Plant, Zuangtui chuan State Referral Hospital (ZMC)-ah April thla leh May thla chhung a thlâwnin oxygen an pe dawn.

Vanglaini zawhna chhangin FK Oxygen Plant enkawltu F Rodingliana chuan, "Mizoramah Covid-19 hri kai an pung nasa a, ni tin mai Covid-19 positive thar an awm belh zel a, sorkar pawh a insengso nasa tawh tih kan hria. Hei vang hian ram tana kan tih ve theih tawk tiin kan thil siam chhuah hmangin ZMC hi kan pui dawn a ni," a ti.

Thu dawn danin, F Kapsanga & Sons-te ta FK Oxygen Plant-ah hian darkar 24 chhungin oxygen bur tê 2,400 an thun khat thei a, a bur lian 514 an thun thei bawk a ni.

SRH-ZMC-a thawkte sawi danin, tun dinhmunah chuan oxygen an neihah thlaphànna tur a la awm lo a, India ram hmun ṭhenkhatah Covid-19 damlote tan oxygen indaih lohna awm mah se Mizoramah chuan oxygen supply hi a awm ṭha a; ZMC lamin an dil vang ni loin midangte ṭanpuina atan FK Oxygen Plant pawh hian an pe a ni.