Aizawlah executive duty 168 ruat tawh

Covid-19 kaihhnawiha dan leh thupekte kengkawh tur leh Aizawl khawpuia dan bawhchhiate vâi turin Aizawl District Magistrate chuan Covid-19 executive duty tur sorkar hnathawk mi 168 a ruat tawh.

Mizoram sorkarin district magistrate-te Covid-19 appropriate behavior (Covid-19 kái lo tura khawsak dan tur) kengkawh tur leh Covid-19 dona kawnga hmalakna hrang hrang atan duty tura sorkar hnathawkte executive duty atan ruat tura a tih angin District Magistrate chuan executive duty turte a ruat a ni.

Aizawl DC Dr Lalhriatzuali Ralte chuan, chawlhkar hnih chhung duty tur an ruat thu Vanglaini palai a hrilh a, "Aizawl khawpui chhunga local council 83-a duty turin team 83 kan siam a, team pakhatah police pakhat leh sorkar hnathawk dang pahnih zel kan ruat a, anni bakah LTF member-te an awm bawk," a ti a; duty tur an ruat zingah harsatna neih vanga phá an awm nual thu leh chu'ng mite aiah chuan mi dang an ruat leh ṭhin thu a sawi.

BDO ṭhuthmunah pawh duty an dah thu sawiin Magistrate chuan, "Thingtlang kilkhâwr deuhah chuan sorkar hnathawk an tam lo a, sikul zirtirtu pakhat chauh awmnate a awm avangin, chutiang hmunah chuan village task force-te kan ring mai," a ti.

Dr Lalhriatzuali chuan, phai aṭanga rawn hawte chu anmahni ina inkhung hrang (home quarantine) tura an duh ber thu sawiin, "Hmunhma nei ṭha chu an ina inkhung mai turin kan duh ber, an tan a him bakah sorkar enkawl quarantine centre din tur chuan sum a tam lo a, tunah rih chuan kan la kalpui rih lo," a ti a; chutih rualin, an ngaihven ve reng thu a sawi.

Covid-19 vei, damdawi-ina enkawl kher ngai lote awmna tur Covid care centre (CCC) lamah an insàwrbing thu sawiin Aizawl DC chuan, "Tunah hian ITI-ah CCC kan buatsaih mek a, naktuk aṭangin a hman theih kan beisei," a ti a; Tourist Lodge-ah man cháwia awmna tur quarantine facility an ruahman thu a sawi bawk.