MLA-in ASF lênna veng a tlawh

Lunglei High Powered Committee (HPC) vice chairman Lawmawma Tochhawng, MLA chuan April 24, Inrinni khan a bial chhunga African Swine Fever (ASF) lênna hmun Electric Veng a tlawh a, ṭanpuina pawisa a pe.

Lawmawma Tochhawng chuan, vawk hri léng avanga mipui harsatna tawh mek chu a tawrhpui thu sawiin, "Hri a darh zel lohna turin sorkarin theihtawp a chhuah mek a ni," a ti a; vawk thi sâwngbâwl leh hri darh zel lohna tura fimkhur ṭulahte AH&Vety department mithiamte thurâwn la zel turin a chah.

Lunglei HPC Vice Chairman hian vawk hri léng tuartute chhawmdawl nan pawisa a pek bakah, Lunglei District Faina Hapta 2020 puala intihsiaknaah Electric Veng chu commercial area-ah pakhatna an nih lawmpui nan Rs. 50,000 leh HPC Cup 2021-a an champion lawmpui nan Rs. 20,000 a pe a ni.

Lunglei Electric Veng hi AH&Vety department chuan April 12, 2021 khan ASF lênna, infected area-ah a puang a, April 20, 2021 khan ASF Epicentre-ah a puang leh bawk. Electric Venga vawk thi chhinchhiah hmasak ber chu April 8, 2021 kha a ni a, April 24, Inrinni thleng khan chhungkaw 33 vulh lai vawk 74 a thi tawh a ni.